Студентите на УКЛО освоија две индивидуални награди на Националниот натпревар за симулирано судење
На Националниот натпревар за симулирано судење, кој се одржа на 12.4.2024 година во Дигиталната судница во Идризово, а во организација на ИДЛО и Амбасадата на САД во РСМ, нашиот тим освои две индивидуални награди, односно за најдобар бранител - Теона Вучева и најдобар сведок/вештак - Ангела Димовска. Во тимот беа уште и студентите Ангела Лавровска, Христина Гарабиљевиќ, Александар Ристевски, Викторија Павловска, Марио Илиевски и Ивона Козарова. Студентите работеа под менторство на вон. проф. д-р Ангелина Станојоска, вон. проф. д-р Ице Илијевски, доц. д-р Ивона Шушак Лозановска и доц. д-р Пакиза Туфекџи и адвокатот д-р Никола Главинче.
На натпреварот учествуваа, покрај нашиот Правен факултет, уште и Правниот факултет при Државниот универзитет во Тетово, Правниот факултет при Универзитетот „Гоце Делчев“ – Штип и Правниот факултет при Универзитетот на Југоисточна Европа.
Оваа година симулациите на главна расправа се однесуваа на кривични дела поврзани со корупција. Нашите студенти подготвуваа писмени списи и симулирано судење за кривичното дело примање поткуп.
Преку учеството на ваквите натпревари, на нашите студенти им овозможуваме практично да се запознаат со текот на кривичната постапка во нашата земја, како и одблиску да ги учат обврските и правата на странките во постапката и функционирањето на судовите во РСМ.
(Комерцијална објава)