Најтивки земји во светот - идеални дестинации ако сакате одмор без метеж и бучава

Ако ви е доста од сообраќај, метеж и постојана бучава, можеби е време за одмор на место каде што тишината е дел од секојдневието. Ново истражување откри кои земји се најдобри за вистинско бегство од динамичното секојдневие.

Кога последен пат сте биле на место каде што навистина било тивко? Звуците на автомобилите, разговорите на соседите, бучавата и другите звуци од секојдневието толку многу ни станаа вообичаени, што вистинската тишина често ја забележуваме дури кога ќе побегнеме од градот.

Токму затоа, новата анализа носи листа со земји во кои може да се најде нешто што денес е сè повредно - мир и тишина.

Според индексот „Нации без врева“, кој го изработила туристичката компанија „Гоу ту Африка“, најтивка земја во светот е Бутан, додека меѓу европските земји најдобро се пласира Естонија.

Како била измерена тишината?

Авторите на индексот анализирале неколку фактори што влијаат врз нивото на бучава и чувството на изолираност. Меѓу нив се густината на населението и бројот на туристи, уделот на руралните подрачја, количината на заштитено земјиште, како и густината на моторни возила, аеродроми и железнички пруги.

Врз основа на овие показатели, на секоја земја ѝ бил доделен резултат од 0 до 100, при што повисокиот резултат значи повеќе тишина.

Бутан на врвот

Бутан го зазел првото место со резултат од 89,44. Земјата е позната по огромните планини, терасовидните долини и високите предели, а токму големиот удел на рурални подрачја придонел за нејзиниот висок пласман.

Покрај тоа, Бутан го ограничува бројот на туристи со воведување надомест за одржлив развој, поради што станува збор за една од поскапите туристички дестинации во светот.

Африка убедливо доминира на врвот на листата - повеќе од половина од првите 25 земји се наоѓаат токму на тој континент.

Намибија е втора најтивка земја во светот, со само 3,83 жители на квадратен километар. Таму се наоѓа и Намиб, една од најстарите пустини во светот, а бројот на туристи исто така е многу мал.

Третото место ѝ припаднало на Боцвана, за што, според авторите на истражувањето, придонела туристичката стратегија заснована на помал број посетители и поголема вредност на туристичката понуда.

Меѓу првите пет се и Замбија и Габон. Замбија има еден од најголемите удели на заштитено земјиште во светот, додека Габон е познат по големите површини со недопрена прашума.

Ниту една европска земја не успеала да се пласира меѓу првите 25. Најдобро поминала Естонија, која го зазела 34. место, додека Финска е на 39. место, а Шведска на 40. место.

Авторите на индексот го поврзуваат тоа со поголемата густина на населението во Европа, големиот прилив на туристи и развиената инфраструктура.

На другиот крај од листата се земјите во кои е тешко да се побегне од метежот и бучавата.

Сингапур е прогласен за најбучна земја според овој индекс, со резултат од само 6,78 поени. Руралните подрачја заземаат само околу 30 отсто од неговата територија, додека густината на туристи е исклучително голема.

Второто место им припаднало на Малдивите, што може да ги изненади оние што ја поврзуваат оваа островска држава со мир и одмор. Сепак, главниот град Мале е едно од најгусто населените места во светот.

Барбадос е трет на листата со најбучни земји. Авторите истакнуваат дека таму има голем број аеродроми во однос на големината на земјата, но и бучава поврзана со бродскиот сообраќај.

Ако целта ви е следниот одмор да го поминете што подалеку од сообраќајот, метежите и туристите, резултатите од овој индекс сугерираат дека одговорот можеби се крие далеку од големите европски градови - во планините на Бутан, пустините на Намибија или пространствата на Боцвана.

Извор: Nova.rs
Фото: Magnific