Како да го заштитите кучето од топлотен удар?
За време на големите горештини не смее да се заборави ниту на домашните миленици, кои, исто како и луѓето, можат да доживеат топлотен удар, познат како хипертермија. Тоа може да има сериозни последици врз нивното здравје.
Нормалната температура на кучето е од 38 до 39,2 степени Целзиусови, Сѐ над тоа е опасно. Кога внатрешната телесна температура на кучето надминува 42,8 Целзиусови степени, доаѓа до топлотен удар. Кучињата имаат два начини да се разладат: проширување на крвните садови и дишење. Кога дишат, ја испаруваат влагата од нивните јазици, носеви и слузницата на белите дробови, што ги лади додека воздухот минува низ влажното ткиво.
-Топлотниот удар обично се случува кога високите температури на околината ја надминуваат способноста на кучето да ја „поднесува“ топлината. Степенот на влошување се одредува од тоа колку е висока температурата на телото и колку долго животното било изложено на тоа - вели ветеринарот д-р Џери Клајн.
Знаци на кои треба да се внимава
Топлотниот удар кај кучињата е опасен по живот и може да има сериозни компликации. Постојат рани знаци на топлотен удар на кои треба да се обрне внимание и да се дејствува пред работите да станат премногу сериозни.
Тоа се: отежнато дишење и забрзано дишење, прекумерна саливација, светлоцрвени непца и јазик, кожа топла на допир и зголемен пулс. Кучињата при топлотен удар стануваат хиперактивни и може да имаат потешкотии во рамнотежата.
Кои групи се најизложени на ризик?
Најчувствителни се многу малите, како и постарите кучиња, кучињата со прекумерна тежина и оние кои не се во форма, бидејќи дополнително се напрегаат и трошат повеќе енергија во претерано топлата средина.
Една од најчестите причини за топлотен удар кај кучињата е оставањето на миленичето затворено во автомобил или во кафез или простор без свежа вода подолго време.
Како се лекува топлотниот удар?
Прво и основно, треба да му помогнете на кучето да се олади, на еден од следниве начини: кучето се носи на ладно место, прскање или миење на кучето со студена (но не претерано студена) или млака вода, носење пред вентилатор или друг освежувач.
Превенцијата е најдобриот лек!
Итното и правилно дејствување и спречувањето се исклучително важни бидејќи може да бидат разлика меѓу брзото и целосно закрепнување и долгорочните последици. Некои ветеринари, исто така, предупредуваат дека кај кучињата кои претрпеле топлотен удар има поголема веројатност тоа да им се повтори.
За крај, советот гласи – одберете да го прошетате миленичето кога Сонцето ќе зајде. И никогаш не оставајте го во автомобил – можеби ќе си недостигате, но подобро е кучето да чека дома.
Извор: МИА