Почна литературниот фестивал „ПРО-ЗА Балкан“
Авторите Мирча Картареску, Јоана Николае, Анте Томиќ, Миљенко Јерговиќ, Оливера Ќорвезироска, и издавачите Гојко Божовиќ, Диана Матулиќ и Андреј Хочевар се гости на Интернационалниот литературен фестивал кој се одржува на повеќе локации во Скопје
Интернационалниот литературен фестивал „ПРО-ЗА Балкан“ започна синоќа во Даут-пашиниот амам во Скопје со присуство на врвни автори од земјава и регионот, а ќе трае до 22 септември.
На првата фестивалска вечер беа претставени лауреатот на наградата „Прозарт“ за авторски придонес во литературата на Балканот и најпреведуваниот современ романски автор Мирча Картареску, романската писателка Јоана Николае, хрватскиот писател Анте Томиќ, најчитаниот автор во регионот Миљенко Јерговиќ и писателката и книжевна критичарка Оливера Ќорвезироска. Во присуство на љубители на пишаниот збор, со нив разговараа македонските писатели: Александар Прокопиев, Ермис Лафазановски и Владимир Јанковски.
Гости на отворањето беа и тројца членови на програмата „Скопје фелоушип“ – српскиот поет, есеист, литературен критичар, уредник, издавачи потпретседател на српскиот ПЕН-центар, Гојко Божовиќ, хрватската уредничка и основачка на литературната агенција „Корто“, Диана Матулиќ и словенечкиот литературен агент Андреј Хочевар од „Гога Паблишинг“.
„Литературата во време на поствистината“ е тема на денешниот фестивалски ден. Во 13 часот во Europe House Skopje ќе се одржи тркалезна маса на која ќе учествуваат гостите писатели и членовите на Скопје fellowship програмата. Поради ковид-протоколите, настанот е затворен за публика, но ќе биде овозможен пренос во живо преку фејсбук-страницата на фестивалот. Традиционално, фестивалот организира средба на членовите на оваа програма со претставници на Македонската асоцијација на издавачите и ќе имаат можност да воспостават идни соработки.
Вечерва во 20 часот, во Кинотеката на Северна Македонија, ќе биде прикажан филмот „Устав на Република Хрватска“ од сценаристот и писател Анте Томиќ, во режија на Рајко Грлиќ. Предвиден е разговор меѓу Томиќ, Јерговиќ и Прокопиев.
Интернационалниот литературен фестивал „ПРО-ЗА Балкан“ е во организација на издавачката куќа „Прозарт медиа“, а е поддржан од ТРАДУКИ, Министерството за култура, Делегацијата на Европската Унија, Град Скопје, Амбасадата на Романија, центарот „Спона“ и од Кинотеката.
Фестивалот ќе биде затворен утре, 21 септември во Даут-пашиниот амам, со доделување на наградата „Прозарт“ и обраќање на лауреатот Мирча Картареску. Писателите ќе читаат извадоци од нивните дела, а ќе следува и експериментална звучна импресија од филмот на Грлиќ во изведба на Гоце Јованоски и Андреа Мирческа. Калин Терзиски ќе се претстави со видеочитање на дел од неговото творештво на затворањето на фестивалот.