Работа од 10 дена вреди 10.000 долари, а уште на самиот почеток се пријавени 3.000 луѓе

Туристичката организација „Визит Сент Пит-Клирвотер“ бара три лица кои десет дена ќе престојуваат на плажите во Флорида, ќе јадат во ресторани, ќе слушаат концерти и ќе уживаат во зајдисонцата, а за тоа ќе добијат по 10.000 долари (околу 8.700 евра). Станува збор за вистинска работа со договор, а веќе се пријавиле повеќе од 3.000 луѓе. Сепак, постои еден услов што повеќето заинтересирани од Македонија и остатокот од Европа веднаш ги исклучува.

Десет дена на плажите во Флорида, вечери во ресторани, концерти во живо и зајдисонца над Мексиканскиот Залив. Сè е платено, а на крајот ве чекаат и 10.000 долари на сметката.

Звучи како наградна игра, но организаторите инсистираат на тоа дека станува збор за вистинска работа со потпишан договор. Туристичката организација „Визит Сент Пит-Клирвотер“, која го промовира округот Пинелас на западниот брег на Флорида, бара три лица за кампањата под наслов „СПЦ-Суит“.

Три позиции, три вида уживање

Секоја од трите позиции има духовито име и јасно дефинирани задачи.

Главниот истражувач на вкусови ќе ја истражува локалната гастрономска сцена. Организаторите во описот на работата наведуваат дека ќе јаде и ќе пие и тоа ќе го нарекува истражување.

Главниот куратор на зајдисонца ќе ги обиколува музеите, стотиците мурали и живописните градски населби, со задолжително уживање во зајдисонцата над заливот.

Главниот директор за добра атмосфера ќе истражува концерти, ноќен живот и различни видови забава.

Секој од тројцата избрани кандидати ќе добие договор вреден 10.000 долари, повратен авионски билет, сместување и ВИП-искуства. Престојот трае десет дена, во периодот меѓу 6 и 22 ноември 2026 година.

За возврат, ќе мора да снимаат и да објавуваат содржини на социјалните мрежи, со јасна назнака дека станува збор за платена соработка. Тројцата избрани повремено ќе работат заедно, но секој ќе има и свои посебни задачи.

„Навистина можете да седите на плажа и да бидете платени за тоа“

Директорот за маркетинг на организацијата, Стив Грајмс, потврди дека овие работи не се само маркетинг-трик. Според него, навистина можете да седите на плажа и да бидете платени за тоа.

Кампањата ја поддржува и Музејот на Салвадор Дали во Сент Питерсбург, кој ќе го угости кураторот на зајдисонца. Од музејот сметаат дека избраните кандидати можат да откријат места што другите посетители ги пропуштиле.

Интересот е огромен. Според податоците на организаторите, во текот на првите денови од конкурсот се пријавиле повеќе од 3.000 луѓе.

Пријавите не ги оценува вештачка интелигенција, туку жири-комисија. Се оценуваат автентичноста и начинот на раскажување, креативноста на видеоснимките, квалитетот на досегашните содржини на социјалните мрежи, како и автентичноста на публиката. Самиот број на следбеници не е пресуден.

Услов што многумина ги елиминира

Меѓутоа, според официјалните правила на конкурсот, можат да се пријават само лица што легално престојуваат во САД и имаат дозвола за работа во таа земја.

Тоа практично значи дека заинтересираните од Македонија и остатокот од Европа кои не живеат и не работат во Америка не ги исполнуваат условите за пријавување.

Постојат и дополнителни услови.

Според правилата на конкурсот, кандидатите мора да имаат најмалку 18 години, но на страницата со описите на позициите се наведува старосна граница од 21 година, па посигурно е да се смета на тој услов.

Неопходно е да се има најмалку еден јавен профил на социјалните мрежи. Кандидатите мора да бидат достапни во текот на сите десет дена од престојот, во периодот меѓу 6 и 22 ноември. Авионскиот билет е обезбеден исклучиво за летови од аеродромите во САД.

Пријавите се поднесуваат преку веб-страницата spcsuite.com до 22 октомври 2026 година на полноќ по источноамериканско време.

Покрај основните податоци и врските до профилите на социјалните мрежи, кандидатите треба да снимат видеоинтервју во кое ќе објаснат зошто токму тие се вистинскиот избор за оваа работа.

Пријавувањето е бесплатно.

Избраните кандидати ќе мора да потпишат договор, да достават документ за идентификација и да поминат проверка на минатото, која вклучува и преглед на нивните досегашни објави на социјалните мрежи.

Извор: Nova.rs
Фото: Magnific