Еве како да ги заклучите вашите разговори со „Чет-ГПТ“

Ако со „Чет-ГПТ“ разговарате на лична или некоја друга чувствителна тема, веројатно сакате тие разговори да ги задржите во приватната сфера.

Новата функција Locked Chats овозможува криење на чувствителните разговори зад четирицифрен ПИН или биометриска потврда на идентитетот на мобилниот телефон, што значи дека други лица со пристап до вашиот уред или екран не можат да ги прочитаат.

Заклучените разговори се задржуваат во вашата историја на разговори - за разлика од привремените разговори, кои се приватни разговори што не се зачувуваат по стандардни поставки - па можете да им се вратите или да ги продолжите во кое било време. Меѓутоа, откако ќе ги заклучите, тие се скриени од вашата редовна историја на разговори и редовното пребарување на разговори.

За да пристапите до нив, мора да одите на Projects, па Locked Chats и да го внесете вашиот ПИН или методот за отклучување на уредот (како што е Face ID или Touch ID).

Како да поставите Locked Chats на „Чет-ГПТ“?

За да започнете заклучен разговор првпат, отворете постоен разговор што сакате да го зачувате како приватен и отворете го менито со опции. Изберете Lock chat и повторно Lock chat, па креирајте или внесете го ПИН-кодот од вашата сметка. Со тоа разговорот се преместува во вашиот проект со заклучени разговори. Ова можете да го повторите со кој било постоен разговор или да започнете заклучен разговор од почеток под Projects, па Locked chats со внесување на ПИН-кодот или методот за потврда на идентитетот и запишување порака за започнување разговор. Кога ќе завршите, изберете Lock now за да го прекинете пристапот до заклучените разговори и да ги скриете од страничната лента. Ако сè уште немате поставено ПИН, „Чет-ГПТ“ би требало да го побара тоа од вас. Изберете Create PIN, внесете го вашиот четирицифрен код и повторно внесете го за потврда. Биометриската потврда можете да ја овозможите и во поставките за ПИН на сметката.