Паровите што заедно ја прават оваа работа имаат посреќна врска

Заедничкото време е важно за квалитетен однос, а ново истражување покажува дека една сосема едноставна активност би можела да им помогне на паровите подобро да комуницираат, полесно да ги решаваат несогласувањата и да чувствуваат помалку стрес во врската.

Физичката активност е позната по многубројните придобивки за физичкото и менталното здравје, но се чини дека би можела да има позитивно влијание и врз партнерските односи. Истражувачите од Универзитетот „Бригам Јанг“ во САД открија дека паровите што заедно вежбаат почесто пријавуваат подобра комуникација, поуспешно решавање на конфликтите и помалку брачни несогласувања.

Истражувањето, објавено во научното списание „Фемили рилејшонс“, опфати речиси 1.700 млади брачни парови од САД. Научниците ги анализираа нивните навики за вежбање, односно дали се физички активни самостојно или со партнерот, и ги споредија со квалитетот на комуникацијата и начините на решавање конфликти во бракот.

Резултатите покажаа дека и самостојното вежбање е поврзано со поповолни партнерски односи, но заедничката физичка активност покажа конзистентно посилна поврзаност со позитивните показатели за квалитетот на бракот.

За подобра врска, доволна е обична прошетка

Интересно е што паровите не мора заедно да одат во фитнес-сала или да се занимаваат со потешки спортови за да уживаат во можните придобивки од заедничката активност.

Најчестата активност што испитаниците ја практикувале заедно била токму одењето.

- Од сите три набљудувани показатели, вежбањето имаше најголемо влијание врз комуникацијата. Затоа беше интересно што одењето беше најчесто пријавуваната активност. Тоа природно нуди можности за разговор - објасни Ешлин Хајат Милденхол, една од авторите на истражувањето.

Според истражувачите, заедничкото движење може да создаде простор за разговор, меѓусебно слушање и поврзување, што во забрзаниот секојдневен живот често им недостига на партнерите.
Паровите што заедно вежбале почесто наведувале дека се чувствуваат сослушани и дека имаат поддршка од партнерот.

Малите заеднички навики можат да направат разлика

Истражувачите открија и еден интересен податок: околу 60 проценти од испитаните брачни другари изјавиле дека вежбаат, но само приближно една третина од паровите вежбале заедно.

Професорот Џереми Јоргасон, еден од авторите на истражувањето, истакна дека поврзаноста не била особено силна, но конзистентно се појавувала во резултатите. Сепак, важно е да се нагласи дека истражувањето покажува поврзаност, а не докажува дека заедничкото вежбање директно го подобрува односот. Можно е и паровите што веќе имаат поквалитетна врска да се посклони кон заеднички активности.