Протести во Франција: Запалени 903 објекти, приведени 457 демонстранти, а повредени 441 полицаец
Бројот на приведените за време на протестите против пензиската реформа во Франција се зголеми на 457, изјави денеска францускиот министер за внатрешни работи Жералд Дарманен.
- Досега се повредени 441 полицаец и жандар, додаде тој, заблагодарувајќи им се на органите на редот и на пожарникарите за нивната работа во текот на демонстрациите. Демонстрациите беа многубројни и на места прераснаа во судири, особено во Париз, до доцна во ноќта - истакна Дарманен.
Тој додаде дека само во Париз биле запалени 903 објекти лоцирани на јавен простор, вклучително и контејнери за ѓубре.
Вчера беше деветти ден од протестите против пензиските реформи во француските градови. Во главниот град на Франција, хулигани ја нападнаа полицијата со шишиња, камења и бомби, а таа одговори со солзавец. Според претставници на органите на редот, меѓу демонстрантите имало 1.500 хулигани, од кои многумина специјално пристигнале тој ден од париските предградија.
Како одговор на протестите на контролорите на летање, француската цивилна авијација побара од авиокомпаниите да откажат 33 отсто од своите летови до и од аеродромот Париз-Орли в недела и 20 проценти в понеделник. Ограничувања од 20 отсто се побарани и за аеродромите во Лион и Марсеј.
Извор: МИА