Дали е подобро да пиете топло или ладно кафе?
Подготвил:
Тамара Гроздановски
Лектор:
Ивана Кузманоска
Ако сакате да пиете топло кафе, имаме добри вести за вас. Резултати од истражување покажаа кога кафето е поефикасно и кога посилно влијае врз организмот.
Во првите 10 минути кофеинот навлегува во вашиот крвоток и се шири низ вашето тело предизвикувајќи зголемување на крвниот притисок и отчукувањата на срцето. По 20 минути кофеинот се врзува за рецепторите на аденозин, неутрализирајќи го заморот. Нивоата на допамин се зголемуваат и опстојуваат, создавајќи чувство на будност и фокус.
По 30 минути работата на надбубрежните жлезди се забрзува и се произведуваат повеќе хормони. Во тоа време, поради проширување на зениците, видот може да стане поостар. По само 40 минути телото почнува да произведува повеќе серотонин, што го подобрува функционирањето на невроните во 'рбетниот мозок, што доведува до подобрување на координацијата и мускулната сила.
Четири часа подоцна метаболизмот работи забрзано, поради што енергијата се согорува побрзо. Во овој период телото почнува да ги разградува насобраните масти. Во рок од шест часа кафето поминало низ вашиот систем и веројатно ќе почувствувате потреба да уринирате. Дотогаш, приближно половина од количината на кофеин што сте ја внеле ќе го напушти вашето тело.
Дали е подобро топло или ладно кафе?
Постојат неколку начини за правење ладно кафе. Ладниот пијалак се прави со ладна вода за помала киселост. Ладното кафе обично е помалку кисело и понежно за вашиот дигестивен систем.
Според истражување објавено во „Сајентифик рипортс“, топлото кафе има повеќе антиоксиданси од ладното кафе. pH-вредноста на топлото и на ладното кафе е речиси иста и се движи од 4,85 до 5,13.
Затоа на оние што имаат стомачни проблеми им се препорачува постудено кафе, додека во други случаи подобро е да пијат топло кафе.
Извор:
ddl.rs
Фото: Freepik