Вирален оглас за работа од Хрватска: „Ќе му обезбедам сѐ - куќа, храна, мобилен, цигари...“
Огласот на Мирослав Недиќ од Бобота, Хрватска, привлече големо внимание поради условите што му ги нуди на идниот работник
Имено, тој бара овчар кој би се грижел за неговите 200 овци, а покрај платата обезбедува сместување, храна, облека, обувки и мобилен телефон. Ако е пушач, ќе добие и цигари, додека во кафулето на Недиќ ќе може бесплатно да пие кафе или друг пијалак.
Триесетгодишниот Недиќ одгледува овци веќе 12 години, а мора да најде нов работник по смртта на човекот кој кај него работел шест години.
- Имав идеален работник, работеше кај мене шест години и ми беше како член на семејството. За жал, почина и морам да најдам некој друг - вели Недиќ.
Што очекува од идниот овчар?
Од идниот вработен очекува да биде вреден, одговорен и да ги сака животните. Тврди дека за возврат ќе му обезбеди сè што е потребно за пристоен живот.
- Кај мене може буквално да штеди и да ја чува платата настрана. Она што го јадам јас, ќе му дадам и нему, односно нејзе, нема да му недостига ниту облека, ниту обувки, ниту што било што му треба секојдневно. Имам кафуле во селото и може слободно бесплатно да дојде - порачува тој.
Работата подразбира пуштање и хранење на овците. Тоа трае меѓу шест и осум часа дневно, додека во зима се работи значително пократко, од еден до три часа. На огласот се јавиле многу Славонци, луѓе од загрепското подрачје, но и неколку жени.
На идниот работник на располагање ќе му биде целосно опремена куќа на крајот од Бобота.
Фото: magnific