Во која европска земја возачите се најагресивни

Некои од најпопуларните туристички дестинации во светот воедно се и прилично непријатни места за возење, покажува ново истражување.

Италија е светски позната туристичка дестинација со прекрасна уметност, живописни пејзажи и врвна храна. Но, ситуацијата е поинаква кога станува збор за нејзините патишта и возачи.

Италија е земјата со најагресивни возачи, според испитаниците во неодамнешното глобално истражување. Дури 23 отсто од возачите изјавија дека во оваа земја доживеале непредвидливо или ризично однесување во сообраќајот.

Велика Британија на второ место

Второто место можеби не е толку очекувано. Велика Британија, која најчесто се поврзува со зелени предели и удобни автомобили, се најде на второто место во анкетата на платформата за изнајмување автомобили, „Дискавер“ карс.

11 отсто од испитаниците рекле дека таму доживеале агресивно однесување во сообраќајот. Лондон често бил споменуван како град во кој се среќава вакво однесување.

САД се на 3. место со 9 отсто, а потоа следуваат Франција и Австралија со по 5 отсто. На 5. место, со по 4 отсто, се најдоа Шпанија и Турција.

Кое однесување најмногу ги нервира возачите?

Најмногу ги иритира ненавременото или целосното непокажување со трепкач при свртување - тоа го навеле 56 отсто од испитаниците. Следува возењето премногу блиску до возилото пред себе, што го навеле 46 отсто од возачите.

На листата се и возењето бавно во лентата за претекнување со 43 отсто и наглото сопирање со 20 отсто.

Кои земји се сметаат за најљубезни?

Перцепцијата за љубезноста на жителите на одредена земја се разликува во зависност од тоа дали се зад воланот или надвор од сообраќајот, но сепак се забележуваат одредени заеднички трендови.

Италијанците не поминале добро во ниту една анкета за манири. Тие се најдоа на 24. место од 25 земји според истражувањето на компанијата за финансиски услуги „Ремитли“. Полошо рангирана била само Австрија.

На врвот на листата се наоѓа Јапонија, каде што поклонувањето и понатаму се смета за знак на почит. По Јапонија следуваат Канада и Велика Британија.

Во истото истражување испитаниците биле прашани и за сопственото однесување, односно дали се сметаат себеси за љубезни и дали кон непознатите луѓе се однесуваат со почит.

Интересно е што Јапонците си дале една од најниските оцени, иако и таа била висока - 8,73 од 10.

Највисока оцена за сопствената љубезност си дале жителите на Бразил и Чиле, со просечна оцена од 9,46. Следуваат Индијците со 9,41, а потоа Швеѓаните и Французите со по 9,40.

Извор: Nova.rs
Фото: Magnific