Отворени се телефонски броеви и сметка за донација за помош на Албанија
Црвениот крст на Македонија со првична помош од 30.000 евра за жртвите од земјотресот во Албанија
Црвениот крст на Македонија изрази сочувство до граѓаните, семејствата и институциите на Албанија за жртвите од земјотресот. Воедно, изразувајќи надеж и верба дека бројот на жртвите нема да се зголеми, информира дека од сопствени резерви ќе додели првична парична и материјална помош во вкупна вредност од 30.000 евра.
- Црвениот крст ја следи состојбата на терен и е во постојан контакт со Меѓународната федерација на Црвен крст и Црвена полумесечина, албанскиoт Црвен крст и владините институции со цел утврдување на приоритетните потреби на терен и организирање хуманитарен одговор. Црвениот крст донесе одлука од сопствени резерви да додели првична парична помош во висина од 10.000 евра наменета за жртвите од земјотресот, како и материјална хуманитарна помош во вкупна вредност од 20.000 евра - се наведува во соопштението.
Хуманитарната материјална помош се состои во вреќи за спиење, ќебиња, монтажни кревети, пакети со храна и хигиенски пакети.
Воедно, објавени се и телефонските броеви за донации 070/075/077 143 400, како и бројот на жиро-сметката на фондот за солидарност 300000001327966, каде што заинтересираните граѓани може да уплатат парични средства.
Фото: Црвен крст на Македонија
Заинтересирани лица од други земји може да донираат на:
NAME OF THE ORGANIZATION: RED CROSS OF THE REPUBLIC OF NORTH MACEDONIA
BANK NAME: KOMERCIJALNA BANKA AD SKOPJE
BANK ADDRESS: UL. ORCE NIKOLOV NO.3, 1000 SKOPJE, NORTH MACEDONIA
BANK ACCOUNT: 300000000000133 25730522-11
SWIFT CODE: KOBSMK2X
IBAN CODE: MK07300701000001228
Исто така, се понудени тимови за одговор при катастрофи од македонскиот Црвен крст за помош и поддршка на албанскиот Црвен крст во справување со последиците од земјотресот. По направените процени, наредните денови Црвениот крст дополнително ќе се ангажира за обезбедување хуманитарна помош, стои во соопштението.