Моќта на природата - карпа висока 137 метри привлекува алпинисти од целиот свет

Оркниските Острови се шкотски архипелаг кој се состои од околу седумдесет острови. Тие се познати по своите неолитски археолошки наоди, риболов, сточарство и, секако, виски, а туристите се привлечени и од приказните за викинзите, како и од спектакуларната природа.

Едно од најимпресивните обележја се наоѓа покрај брегот на островот Хој и многумина ќе се согласат дека е една од најголемите природни знаменитости во цела Велика Британија. Тоа е морска карпа широка 30, а висока 137 метри што се издига од морето како необичен оџак. Се нарекува „Старецот од Хој“ и е одделена од островот со бездна широка 60 метри, која постепено се полни со камења што паѓаат од „Старецот“ со текот на времето.

И покрај своето име, „Старецот“ е всушност доста млада карпа, барем во светот на карпите. Се смета дека е стара помалку од 400 години, а историските записи, мапи и скици од крајот на 18 век наваму покажуваат како се променила. Најстарите покажуваат дека некогаш се работело за 'рт, а силните бури постепено го издлабиле гребенот на карпата и во основата на добиениот столб се создала дупка како тунел. Така карпата ги добила своите „две нозе“, а поради нив и своето име.

На почетокот од 19 век едната нога се срушила, оставајќи го „Старецот“ во формата во која го наоѓаме денес. Освен од островот Хој, можете да го видите „Старецот“ и од локалните фериботи што пловат до островот.

Карпата сè уште еродира. Се појавила и пукнатина длабока 40 метри, па веројатно карпата ќе биде значително пониска во иднина. Дотогаш, како што е во последните шеесет години, „Старецот“ ќе привлекува алпинисти од целиот свет.

Првото успешно искачување го направиле Крис Бонингтон, Расти Бејли и Том Пати во 1966 година. Денес, постојат седум патеки за искачување, а на самиот врв, секој што ќе стигне до него може да потпише книга - која е заштитена од суровото време во херметички затворен пластичен сад.

Извор: punkufer.dnevnik.hr

Фото: YouTube screenshot