Германски министер предлага законско право за работа од дома
Подготвил:
Тамара Гроздановски
Лектор:
Ивана Кузманоска
Германскиот министер за труд Хубертус Хајл изјави дека планира да предложи воведување законско право за работа од дома во случаи во кои тоа е изводливо.
Тој вели дека овој закон сака да го предложи наесен и дека, според првите процени, во текот на пандемијата бројот на луѓето што работат од дома порасна од 12 на 25 отсто, па на ваков начин сега работат речиси 8 милиони луѓе. Основата на неговиот предлог е да им се овозможи на работниците да работат од дома цело време или барем еден или два дена во неделата.
- Секој што сака и чие работно место го дозволува тоа, треба да има можност да работи во неговата домашна канцеларија - дури и кога ќе заврши пандемијата на коронавирусот - изјави Хајл.
Социјалдемократската партија на Хајл, малцински партнер во владејачката коалиција предводена од канцеларката Ангела Меркел, уште во декември повика на воведување право за работа од дома.
Фото: Unsplash
Светот сега е погоден од глобалното ширење на коронавирусот. Германија, како и многу други земји, ги стави своите граѓани во изолација, спречувајќи отворање на несуштински бизниси и спроведувајќи строги мерки за јавниот живот.
Оваа недела Германија ги презеде првите чекори кон олеснување на мерките. На малите продавници ќе им биде дозволено да отворат, а по 4 мај ќе се отворат и некои од основните и средните училишта.
Но, строгите мерки за движењето во јавноста и натаму се во сила - дозволено е групирање на само двајца, а исклучок се семејствата. Во сила и понатаму е правилото за социјално дистанцирање.