Овој австриски парк е дизајниран за почитување на социјалното дистанцирање
Подготвил:
Тамара Гроздановски
Лектор:
Ивана Кузманоска
Многу паркови и јавни градини се затворени поради изолацијата и рестрикциите затоа што властите се загрижени дека граѓаните нема да ги почитуваат правилата за социјално дистанцирање.
Но, во Австрија дизајнерите смислиле начин на како луѓето да бидат одделени, а сепак да ги искористат придобивките од природата.
Во Виена познатите паркови како Шенбурн и Белведере се затворени поради вирусот, оставајќи им на луѓето ограничен простор да вежбаат или да прошетаат на свеж воздух. Ваквите ограничувања предизвикаа нова идеја - парк што сам ги воведува правилата за социјално дистанцирање.
Студиото „Прехт“ дошло до интересно идејно решение за еден простор во Виена - да го претвори во парк што ќе биде дизајниран за принудно почитување на правилата за социјално дистанцирање, наречен „Парк де ла дистанц“.
Инспирација за паркот биле отпечатоците од прстите - ѕидови во форма на спирала, поставени како лавиринт.
- Исто како отпечаток од прсти, паралелните ленти ги водат посетителите низ брановиден пејзаж. Секоја лента има влез и излез што укажува дали патеката е зафатена или можете слободно да шетате по неа. Патеките се оддалечени 240 сантиметри една од друга и имаат ширина од 90 сантиметри - објаснува дизајнерот Крис Прехт.
Посетителите што шетаат низ патеките, иако се оддалечени поголемиот дел од времето, можат да слушнат чекори од соседните патеки за да не се чувствуваат премногу изолирано.
- Индивидуалното патување трае околу 20 минути и нуди кратко време да уживате во самотијата. Привремено изолирање од јавноста: момент за размислување, медитирање или прошетка во
природата - додава Крис.
Иако предлогот е дизајниран специфично за Виена, од „Студио Прехт“ велат дека може да се приспособи каде било и дека паркот ќе го издржи тестот на времето дури и тогаш кога ќе можеме повторно да шетаме рамо до рамо.