Мало арктичко село на Алјаска сака да доаѓаат туристи и да ги набљудуваат поларните мечки
Кон крајот на секое лето големи бели мечки се собираат надвор од селото Кактовик, Алјаска, далеку над Арктичкиот Kруг, за да се хранат со остатоците од китови што ги оставиле ловците.
Тоа е глетка која некогаш привлекуваше 1.000 или повеќе туристи секоја година во Кактовик, единствената населба во Националниот арктички резерват за диви животни, во феномен кој понекогаш се нарекува „туризам на последна шанса“, можност да се видат величествени глетки и суштества пред климатските промени да ги истребат.
Ковид-пандемијата и наредбата на федералната влада, која ги запре турите со чамци за набљудување мечки, во голема мера го прекинаа туризмот во Кактовик поради загриженоста дека малото село е преплавено со странци.
Но, властите на Кактовик се надеваат дека повторно ќе го оживеат со оглед на тоа што би можело да вреди милиони за локалната економија и да им обезбеди на жителите уште еден извор на приход, под услов селото да постави насоки кои ќе го заштитат нивниот начин на живот и самите мечки.
- Дефинитивно гледаме корист од туризмот. Работата е што не може да се води како порано - вели Чарлс Лемп, претседател на корпорацијата „Кактовик Инупиат“, која поседува 373 квадратни километри земјиште.
Двата градски хотели и ресторани изгубија дел од својот бизнис кога големите оператори почнаа да носат туристи со авиони од Фербенкс или Енкориџ за еднодневни излети. Локалните жители се жалеа дека туристите зјапаат во нив или минуваат низ нивните дворови.
Капацитетот на малите авиони стана проблем, при што жителите понекогаш се натпреваруваа со туристите за места на летовите до или од поголемите градови поради медицински прегледи, принудувајќи ги оние што останаа заглавени во градовите да преноќат во скапи хотели.
Кога избувна пандемијата, Кактовик ги стопира посетите. Потоа, во 2021 година, федералната влада, која управува со поларните мечки, ги запре турите со чамци, главно поради загриженоста за тоа како туристите влијаат врз однесувањето на мечките и го преплавуваат градот.
Лидерите на домородните заедници на Алјаска сега преговараат со Американската служба за риби и диви животни за да ги решат овие проблеми и повторно да го заживеат туризмот.
Посетителите го преплавуваа малото село
Уште од раните 80-ти години секој во Кактовик што имаше чамец и ги познаваше водите можеше да поведе неколку туристи да ги набљудуваат мечките додека се движат по рамните острови веднаш до брегот или ги кинат ребрата на гренландскиот кит што ловците ги оставиле за свои потреби.
Туризмот во Кактовик нагло порасна откако федералните власти во 2008 година ги прогласија поларните мечки за загрозен вид. Брзото затоплување на Арктикот го топи морскиот мраз што мечките го користат за лов на фоки, а научниците рекоа дека повеќето поларни мечки би можеле да исчезнат до крајот на векот.
Како што растеа посетите, федералната влада воведе прописи кои бараа туристичките оператори да имаат дозволи и осигурување, и тоа почна да го отстранува локалното население од индустријата, рече Лемп.
Меѓу промените што лидерите на Кактовик сакаат да ги видат е ограничувањето колку долго чамецот може да остане во вода близу мечките. Предолго, рече Лемп, и мечките се навикнуваат на луѓето, што создава опасна ситуација кога мечките ќе залутаат во градот барајќи храна.
При туристичкиот бум стана потешко да се избркаат мечките од градот, дури и кога градската патрола пукаше во нив со ќорци. Патролата мораше да убие околу три или четири мечки годишно, во споредба со можеби една годишно пред бумот, рече Лемп.
Во 2023 година, 24-годишна жена и нејзиниот едногодишен син беа убиени од поларна мечка на крајниот запад на Алјаска. Тоа беше прв смртоносен напад на поларна мечка по речиси 30 години на Алјаска, единствената американска држава каде што живее овој вид.
Откако турите со чамци во Кактовик беа запрени, се чини дека мечките повеќе се плашат од луѓето, рече Лемп.
Извор:
021.rs
Фото: Freepik