Индија планира да пушти крокодили и отровни змии во речната граница со Бангладеш

Индиските официјални лица предложија да се пуштат крокодили и отровни змии во речните делови на границата со Бангладеш, каде што е тешко да се постави ограда.  Тие би требало да служат како природна пречка за илегалната миграција и шверцот.

Границата меѓу Индија и Бангладеш, долга 4.096 километри, минува низ некои од најпредизвикувачките терени, а Њу Делхи заклучи дека е невозможно да се оградат делови од неа. Во допис од 26 март, индиските Гранични безбедносни сили (БСФ) им наредија на своите единици да ја истражат изводливоста за користење влекачи во ранливите речни процепи. Овој потег на владата ги вознемири активистите за човекови права и за заштита на дивиот свет, пишува Ал Џезира.

„Би било смешно да не е злобно и опасно“

Министерството за внатрешни работи наведе дека БСФ, и покрај тешкиот терен, успешно ги сузбива илегалните прекугранични активности и миграциите на луѓе без документи од Бангладеш.

- Одредени проблематични подрачја, како речните и низинските зони, населбите во близина на границата, нерешените случаи на откуп на земјиште и протестите на пограничното население го забавија поставувањето на оградата на некои делови од оваа граница - стои во извештајот.

Аналитичарите и активистите изразија загриженост поради можноста за користење опасни животни како крокодили за одвраќање на бегалците и мигрантите.

- Ова би било смешно да не е злобно и опасно - вели Ангшуман Чаудури, истражувач специјализиран за североисточните и источните индиски погранични држави.

„Ова е врв на суровоста и дехуманизацијата“

- Еднаш кога ќе пуштите отровни змии и крокодили, тие нема да можат да разликуваат дали некој е од Бангладеш или од Индија. Ова е врв на суровоста и дехуманизацијата на мигрантите без документи. Сосема нов начин на претворање на природата и животните во оружје против луѓето. Тоа е биополитичко насилство од нов вид и Ахилова пета на индиско-бангладешката граница - изјави Чаудури.

Индиската влада подолго време тврди дека мигрантите без документи претставуваат закана бидејќи ја менуваат демографската слика на Индија. Официјалните лица на БСФ во неколку наврати се најдоа на насловните страници поради тоа што заканувајќи се со оружје физички ги туркаа индиските муслимани во Бангладеш.

Не постојат официјални статистики за бројот на мигранти без документи во Индија. Иако овој месец започна нов попис на населението, последниот беше спроведен во 2011 година. Дури и ако бројот на мигранти без документи расте, Индија се одлучи за „вонсудски методи“ наместо да соработува со владата на Бангладеш и да ја следи правната постапка за нивно предавање, вели активистот за човекови права Харш Мандер.

Крокодилите не се автохтони на тоа подрачје

Крокодилите не се автохтон вид во речните делови на индиско-бангладешката граница, изјави Ратин Барман од организацијата „Вајлдлајф траст од Индија“. 

- Ако бидат преселени во пограничните подрачја, можеби нема да преживеат. Како прво, за брзо ќе умрат. Истото важи и за отровните змии, додаде тој и предупреди дека какво било манипулирање со природното живеалиште на видовите не е добро.