Понуда што го заинтригира регионот: Се бара семејство што би живеело на нивниот имот и би било платено за тоа

Имотот се наоѓа во бањалучка населба, а семејството што ќе се всели, покрај сместувањето, ќе има обезбедено плата, пријава и сите придонеси.

Семејството Пустахија од Хрватска бара семејство што би живеело на нивниот голем имот во бањалучката населба Мотике. За возврат нуди сместување, плата од околу 920 евра, пријава и сите придонеси.

Предност имаат семејствата со деца кои веќе имаат искуство со селски начин на живот и знаат што значи да се работи на имот.


Тихомир Пустахија е роден во Мотике пред 66 години. Но по земјотресот во 1969 година се преселил со семејството, а денес живее во Хрватска.

Тој нагласува дека зад оваа иницијатива не стојат финансии, ниту потрага по евтина работна сила, туку желбата да го сочува имотот на својот дедо и да му даде можност на семејство што ја сака природата, сака да живее на село и да им овозможи на децата да растат во здрава средина.

Што се наоѓа на имотот?

На имотот се наоѓа уредена куќа со три спални соби. Покрај неа има штала, свињарник и кокошарник, а има и стадо овци.

На располагање е и земјоделска механизација: трактор, тример и моторна пила. Семејството што ќе се всели не би морало да почнува од нула, туку би презело имот што веќе е во функција.

Работата на идните домаќини подразбира секојдневна грижа за животните, за што се потребни 5 до 6 часа дневно. За потешките физички работи, како што се косење трева, балирање сено или кастрење овошки, обезбедена е дополнителна помош.

Пустахија наведува дека понудата вклучува постојан работен однос, пријава, платени придонеси и можност за долгорочен престој на имотот.

Извор: Nova.rs
Фото: Screenshot/YouTube