Главниот град на Литванија ќе се претвори во отворен ресторан кој дозволува социјално дистанцирање

Главниот град на Литванија, Вилнус, ќе претвори многу улици и отворени простори во барови, ресторани и кафулиња со цел да не згасне индустријата, а луѓето ќе можат да одржуваат растојание. Многу од градските јавни места, како плоштадите, сега ќе бидат отворени за користење од страна на ресторани.

Властите ја објавија веста во петокот, а во текот на викендот биле примени над 162 апликации од фирми кои сакаат да учествуваат во проектот.


Литванија веќе почна со отстранување на некои мерки за ограничено движење поради пандемијата. Во Литванија се регистрирани 1.344 заболени случаи на коронавирус и 44 смртни случаи. Многу кафулиња, продавници и други продажни места повторно почнаа со работа оваа недела. 

Според претходните правила, кафулињата што имаат отворен простор можеа да работат доколку има 1 метар растојание од тротоарите и 2 метри растојание помеѓу масите. Ова ги ограничи локалите што немаат отворен простор.


- Раздвиженоста е многу голема, што покажува дека кетеринг-услугите го гледаат ова како можност за да можат ефикасно да го преживеат овој период. Плоштадите и улиците ќе бидат на располагање бесплатно за да можат рестораните да ги одвиваат активностите за време на карантинот. Само отворете ги штандовите, работете, задржете ги работните позиции и одржете го Вилнус жив. Секако, приоритет е безбедноста за сите - изјавил градоначалникот на Вилнус, Ремигијус Шимашиус.

Дополнително на новата мерка, општината ќе им додели ваучери за рестораните на некои медицински лица. 

Автор: Хери Кокбурн
Извор: independent.co.uk