Европски дестинации ги наградуваат туристите за одговорно однесување

Туристичките дестинации низ Европа сè потешко се справуваат со големиот број посетители. Додека некои воведуваат такси, казни и ограничувања, други избираат попозитивен пристап и ги наградуваат туристите за одговорното однесување со попусти, бесплатни содржини и други поволности.

Еден од првите примери е Копенхаген. Преку иницијативата „Копенпеј“, туристите можат да добијат бесплатни возења со велосипед или брод, па дури и оброк, ако користат јавен превоз, собираат отпад или учествуваат во активности во општествените градини.

Попусти за оние што ја чуваат природата

Сличен модел има и во британскиот национален парк Ексмур, каде што посетителите се поттикнуваат да собираат отпад, да бележат доколку забележале диви животни, да доаѓаат со велосипед или јавен превоз и да споделуваат позитивни објави за паркот. За тоа можат да добијат 20 отсто попуст во 3 информативни центри.

Поевтино скијање ако пристигнете со воз

И алпските дестинации ги наградуваат туристите што користат одржлив превоз. Во италијанската Виа Латеа патниците кои со воз ќе пристигнат во Улкс добиваат од 20 до 25 отсто попуст на ски-картите. Во Франција оние што до скијалиштата патуваат со воз можат да добијат попусти за ски-карти, опрема, школи за скијање и сместување.

Швајцарија, пак, на корисниците на „Свис травел пас“ им овозможува бесплатен влез во повеќе од 500 музеи, како и поевтини билети за многу планински железници.

Попусти и за оние што патуваат одржливо

Во Нормандија туристите што пристигнуваат со воз, автобус или велосипед можат да добијат најмалку 10 отсто попуст во многу замоци, музеи, споменици и паркови, но и за активности како изнајмување велосипеди и возење со кану.

Во Лондон, пак, учесниците во акциите за чистење во рамките на иницијативата „Пластик фри џулај“ можат да добијат бесплатен пијалак.

Награди и за подолг престој

Слични проекти има и во Германија. Во Бремен, програмата „Бременпеј“ ги наградува посетителите што пристигнуваат со воз, користат велосипед или го продолжуваат престојот. Во зависност од активноста, можат да добијат бесплатно кафе, обиколка на градот или поевтини билети за туристички атракции.

Сличен систем е тестиран и во Берлин, каде што туристите може да добијат бесплатни искуства или попусти за собирање отпад, возење велосипед и други корисни активности.

И Хелсинки размислува за ваков модел

Сличен концепт се разгледува и во Хелсинки, каде што сакаат да развиваат регенеративен туризам и да придонесат за обновување на Балтичкото Море. Туристите би биле поттикнувани да користат јавен превоз и велосипеди, а за возврат би можеле да добијат бесплатни оброци, поевтини тури и други поволности.

Наместо „не правете го ова“, сè повеќе европски дестинации испраќаат поинаква порака: „Однесувајте се одговорно и ќе бидете наградени“.

Извор: n1.info.hr
Фото: Wikipedia