Ново истражување покажува дека за неколку децении може да дојде до крај на цивилизацијата како резултат од еколошкото уништување, ограничените ресурси и растот на населението. Климатските промени само ја влошуваат ситуацијата, пишува „Скај њуз“.

Можниот колапс на цивилизацијата би бил резултат на распаѓањето на синџирите за снабдување, меѓународните договори и глобалните финансиски структури, се вели во истражување спроведено од научници на Универзитетот „Англија Рускин“. Според нив, проблемите брзо би се зголемиле поради меѓусебната поврзаност и економска зависност на државите.

Во истражувањето била направена анализа на 20 држави за да се идентификува нивната способност да ја задржат цивилизацијата во случај на глобален колапс. Нов Зеланд е на врвот на листата, по што следуваат Исланд, Обединетото Кралство, Ирска и Австралија.


Овие држави се острови или островски континенти во кои има помалку екстремни временски услови. Овие земји би можеле да имаат услови за преживување во иднина и покрај ефектите на климатските промени, според истражувачите.

Нов Зеланд може да произведува геотермална и хидроелектрична енергија, има земја што може да се користи за производство на храна и не е густо населена.

Според истражувачите, климатските промени и движењето на населението може да ги диктираат промените на предвидувањата за иднината. Пандемиите се уште еден ризик за стабилноста на цивилизацијата, според нив.

Извор: Sky News