Огромни загуби, превработеност, рекламации за загубени пратки, лоша организација и лошо менаџирање станаа синоними за некогашниот државен гигант за поштенски услуги - АД Пошта.
Кулминација беше последниот настан кога вработените молеа да земат плати, а синдикатот објави дека лошото менаџирање довело до тоа на еден работник да има еден шеф и 80 отсто од вработените да земаат минимални плати.
- Плата исплатија по протестот, но поради сериозноста на состојбите во друштвото и неизвесноста од финансиската криза за редовна исплата на плата во нареден период, продолжуваме со законска постапка за организација на штрајк за заштита на социјално-економските права. Кризата е резултат на лошата организација на работењето во Македонска пошта предизвикана од кадровската политика и менаџирањето со години, кое се спроведува со непродуктивно прераспоредување и вработувања. Сега имаме недостиг на работници во технолошкиот процес, како што се разнесувачи на пошта и шалтерски работници, но имаме преполни работни места во администрација и шефовски позиции - истакна за „Факултети.мк“ претседателот на Синдикатот во Пошта, Боро Велигденов.
Корисниците избираат приватни пошти поради брзината на достава
Анализата на Агенцијата за пошти покажува дека во првото полугодие од 2023 година работеле 36 даватели на поштенски услуги. 103 рекламации биле поднесени за услугите на Пошта за само шест месеци, а 659 за услугите на приватните пошти. Рекламациите за државната пошта се за препорачани писма, односно 89,3 проценти се за пречекорување на рокот за достава, а 10,7 проценти за изгубени препорачани писма.
Пошта во првото полугодие од 2023 година има намалување на речиси сите услуги и тоа во рамките на универзалната услуга за 5 проценти. Пратките за коресподенција, како услуга која треба да биде достапна до сите корисници е со опаѓање од 4,9 проценти, а влијание врз оваа надолна тенденција има и намалувањето на бројот на поштари од 648 на 549 за една година.
Истражувањето за потребите на корисниците на поштенски услуги за 2023 година кое го направи Агенцијата за пошти покажа дека корисниците сѐ повеќе ја одбегнуваат државната Пошта и избираат друг давател на услуги, најмногу поради брзината на достава и брзото преземање на пратката, но и поради неколкумесечното чекање на своите пратки.
Корисниците треба да ги користат своите права независно дали се испраќач или примач на пратката. Тие имаат право да пратат рекламација за услугата и доколку не добијат одговор или не се задоволни од одговорот, корисниците треба да поднесат претставка, односно управен приговор до Агенцијата за пошти.
Не профункционира вадењето изводи и документи на шалтер
Пред точно една година Министерството за информатичко општество најави дека ќе ја враќа довербата во државната Пошта со тоа што ќе го прошири проектот „Една точка за услуги“ која функционира само на пет локации: Скопје, Куманово, Битола, Охрид и Тетово.
Инфраструктурата на националната Пошта требаше да се користи за да се обезбедат услуги од администрацијата за граѓаните на 333 локации во државата, со користење на просторните и кадровските капацитети на Поштата и да се вадат изводи, потврди и документи на обичен шалтер во некоја од тие поштенски подружници.
- „Една точка за услуги“ реално опслужува многу малку процеси. Направивме анализа. Заедно со АД Пошта на 333 места на ниво на државава ќе ги отвориме овие точки во кои нема да креираме нова инфраструктура, туку инфраструктурата на Пошта, и човечка и физичка. Таму ќе бидат опслужени сите граѓани на ниво на земјава со услугите што им се нудат. Решението е да се отворат 333 точки без да се инвестира многу. Направивме работна група со АД Пошта на РСМ за брзо да се воспостават тие точки. Веќе работиме на тоа. Пошта има канцеларии во секој дел на државата, има вработени и добра интернет-конекција, но нема добро обучен кадар за да ги нуди сите услуги „Една точка за услуги“ и шалтер на кој ќе пишува ЕТУ. Со мала инвестиција, со еден чекор ќе се доближиме до секој граѓанин за да може да има пристап до сите услуги - изјави тогаш министерот за информатичко општество и администрација Азир Алиу.
Но, од Пошта велат дека проектот не профункционира иако останаа уште неколку постапки за довршување на целиот процес, како што беа измени на законските решенија со кој пристап до „Една точка за услуги“ ќе имаа и вработените во АД Пошта.
Големи загуби, многу вработени
Пошта има акумулирана загуба од 18,7 милиони евра за 2022 година и 1.937 вработени на крајот од 2023 за чии бруто-плати се издвојувале 14,8 милиони евра, што само го потврдува недомаќинското работење на менаџментот во текот на последните десет години.
И ревизорите во својот извештај за 2022 година констатираа дека натамошната работа на акционерското друштво ќе зависи од финансиската поддршка на сопственикот – државата, главно поради високите трошоци за плати. Сугерираат и дека е време да се расчисти сопственоста, која уште ја делат со Македонски телекомуникации.
Поради тешкотиите, Владата во 2020 година отвори расправа за нејзина приватизација и ангажираше компанија да спроведе физибилити-студија за работата на институцијата.
Според студијата, на Пошта ѝ недостига организација и ефикасно управување на поштенските единици, кои досега функционирале како независни и својата работа ја вршеле на различен начин наместо според еден единствен систем.
Фото: фејсбук-страница на АД Пошта