Нашата публика токму вечерва првпат ќе го види филмот. Во 20 часот е закажана македонската премиера во киното „Синеплекс“. Филмот утре ќе има премиера и во киното „Милениум“ во истиот термин и ќе се задржи на репертоар во двете кина. Главната улога во филмот ја толкува актерката Зорица Нушева. 

Како што известува продукцијата „Сестри и брат Митевски“, прикажувањето на филмот надвор од земјава ќе почне на 1 мај во Франција, а потоа ќе следува кинодистрибуција низ целиот свет од Далечниот Исток во Кина, Јапонија, до Австралија, преку Јужна Америка во Бразил и Колумбија, па на север до Канада, преку Турција и земјите од Блискиот Исток, до Источна Европа, вклучително Русија, Полска, Романија, Унгарија, Украина, па следуваат Италија, Шпанија, Белгија, Австрија, Луксембург, Шведска, Данска и Швајцарија, како и во регионот - Србија, Босна и Херцеговина, Хрватска, Словенија, Црна Гора и во Грција.

Покрај овие, веќе потврдени земји, преговорите продолжуваат и за останатите земји што изразија интерес, како САД, Германија, Мексико и други. Агентот за продажба „Пирамид“ потенцира дека неверојатно добрите реакции на публиката во Берлин и добрите критики на светските критичари придонесоа за овој исклучително голем интерес од дистрибутерите, а пак голем дел од нив веќе го имаа откупено филмот и за време на фестивалот. Тие продолжуваат со работа на пласманот на филмот со учество на најголеми филмски маркети и фестивали по нивен избор во наредниот период.