Во преполната сала во Универзитетската библиотека ,,Св. Климент Охридски" во Битола, во вторникот, беше промовирано меѓународното научно списание “Journal of Liberty and International Affairs”. Издавач на списанието е Институтот за истражување и европски студии - Битола. Организатори на промоцијата беа НУУБ “Св. Климент Охридски” - Битола и Институтот за истражување и европски студии - Битола.
Повеќе околу списанието и неговото значење како прво меѓународно научно списание во дадената област во Р. Македонија, изнесоа членовите на уредувачкиот одбор кои накратко во своите излагања објаснија за начинот на функционирање на списанието и критериумите за објавување на научни трудови.
Journal of Liberty and International Affairs е меѓународно рецензирано научно списание, кое излегува три пати во годината, според open-access моделот (или моделот на отворен пристап), а со тенденција за детално проучувањето на слободата и меѓународните односи во сите нивни аспекти.
Имено, списанието гравитира во областа на политичките науки, меѓународното право и меѓународните односи.
Покрај трудовите кои што произлегуваат од главниот фокус на списанието, секој број вклучува и тематски блок како начин за реализација на примарната функција на списанието и можност за адресирање на комплексните и деликатни прашања поврзани со слободата и меѓународните односи на еден концентриран начин.
Во контекст на уредувачката струткура, научното списание вклучува меѓународен програмски и советодавен комитет во кој партиципираат 35 научници од 28 држави ширум светот, а кои даваат посебен придонес во квалитетот и меѓународниот карактер на списанието.
Поради поголема видливост на списанието и трудовите објавени во него, тоа е индексирано во бројни референтни меѓународни бази на научни списанија (во моментов во 57 меѓународни и универзитетски бази), од кои можат да се издвојат следните: Directory of Open Access Journals (DOAJ); International Political Science Abstracts (IPSA); European Reference Index for the Humanities and the Social Sciences (ERIH+); Social Science Open Access Repository (SSOAR); European Sources Online (ESO); Google Scholar; HARVARD Library (HOLLIS+); SHERPA/RoMEO; CiteFactor; JournalTOCs; Open Academic Journals Index (OAJI) и многу други.
Списанието можете да го посетите на:
www.e-jlia.com
Контакт: contact@e-jlia.com
Официјалната фан-страница на „Фејсбук“.