Бројот на бегалци во светот достигна рекордни 70 милиони луѓе, соопштија Обединетите нации, додавајќи дека толкав број бегалци не е забележан уште од Втората светска војна.

Во соопштението на германскиот разгранок на УНХЦР, објавено пред Светскиот ден на хуманитарноста, се наведува дека луѓето бегаат од војните, прогонот и последиците од глобалното затоплување.

Хуманитарната организација СОС Детско село објави дека минатата година се убиени или повредени 12.000 деца. Се додава дека илјадници се киднапирани и станале деца војници, а стотици илјади имаат сериозни трауми.

Најголем број убиени или повредени деца се регистрирани во Авганистан (3.062), Сирија (1.854) и Јемен (1.698).