Илјадници јапонски гледачи ќе имаат право да присуствуваат на настаните на Олимписките игри ова лето, соопштија организаторите во понеделникот, и покрај предупредувањата на здравствените експерти дека метежите би можеле да разгорат нов бран на ковид-случаи.

Претседателот на организацискиот комитет на Токио 2020, Сеико Хашимото, рече дека присуството ќе биде ограничено до 50 отсто од капацитетот на локацијата или максимум 10.000 луѓе.

- Во светло на ограничувањата на владата за јавни настани, ограничувањето на гледачите за Олимписките игри ќе биде поставено на 50 отсто од капацитетот на просториите, најмногу до 10.000 луѓе на сите места - велат организаторите.

Одлуката за гледачите на Параолимписките игри ќе биде одложена до 16 јули, една недела пред отворањето на Олимписките игри. Јапонските медиуми јавуваат дека дури 20.000 луѓе можат да присуствуваат на церемонијата на отворањето на Олимписките игри на главниот стадион, но организаторите изјавија дека бројот нема да биде толку голем.

Владини претставници изјавија дека ќе ја остават отворена опцијата за одржување настани без гледачи доколку се влоши ситуацијата со ковид-случаите пред или за време на Олимписките игри.

- Ако дојде до големи драматични промени во случаите, ќе треба повторно да се разгледа опцијата да нема гледачи - изјави гувернерот на Токио, Јурико Коике.

По онлајн-состанокот со Меѓународниот олимписки комитет, Меѓународниот параолимписки комитет и јапонските влади, Коике изјави дека овие ограничувања ќе важат во принцип, но тие можат да бидат ревидирани во случај на вонредна состојба или други мерки за вируси кои стапуваат на сила во тоа време.

Од гледачите ќе биде побарано да носат маски, да патуваат директно до местото каде што ќе се одржува олимпискиот настан и веднаш да се вратат дома по настанот. Извршниот директор на Токио 2020, Тоширо Муто, вели дека барањето да приложат доказ за вакцинација или негативен ПЦР-тест би било проблематично.

Одлуката за тоа дали да се послужи алкохол на места е сè уште под дискусија, додека ќе треба да се одржи нова лотарија меѓу постоечките сопственици на билети. Пред одложувањето на игрите минатата година, организаторите продадоа околу 4,45 милиони билети за Олимписките игри и скоро милион билети за Параолимпијадата во Јапонија.

Минатата недела главниот здравствен советник на јапонската влада, Шигеру Оми, рече дека забраната за сите навивачи ќе биде најбезбедна опција.


- Најдобро би било да нема навивачи. Без оглед дали ќе се одржи Олимпијадата или не, Јапонија има ризик повторно да се соочи со инфекции што повторно ќе извршат притисок врз медицинскиот систем - додава тој.

Организаторите на Олимписките игри оваа година одлучија да забранат гледачи од странство, додека бројот на официјални лица, новинари и помошен персонал е намален на под 80.000, покрај 11.500 спортисти.

Јапонската јавност останува против одржувањето на Олимписките игри. Според анкетата од „Асахи Њуз нетворк“, 65 отсто од испитаниците изјавиле дека сакаат Олимписките игри да се одложат или откажат. Речиси 70 отсто од испитаниците изјавиле дека нема да се одржат безбедно и покрај уверувањата на премиерот Јошихиде Суга.

Суга неодамна ја укина вонредната состоја во Токио и осум други префектури. Главниот град и шест други региони сега се под квази-вонредни ограничувања до 11 јули. Иако сега на баровите и рестораните им е дозволено да служат алкохол до 19 часот, мора да затворат еден час подоцна.


Извор: The Guardian
Фото: Wikipedia