Заврши реновирањето на Блокот „А“ од студентскиот дом „Гоце Делчев“. Заменик Министерот за образование Спиро Ристовски најави целосно завршување на блокот за следната академска година.

Блокот „А“ е втор блок врз кој се извршува реновирање во студентскиот дом „Гоце Делчев“, а променета е и инсталацијата за електрична енергија, парното, гипс картоните и прозорците. Претходно во фаза беше реновирано крилото „Б“ кое есента ги прими првите студенти. Проектот, кој чини 6 милиони евра, треба целосно да ги реновира и опреми со нов мебел сите 4 крила и мензата, а во него се опфатени и лифтовите.

„Во текот на вчерашниот ден е склучен и договорот со компанија што во летниот период траба да заврши со комплетно реновирање и промена на лифтовите во сите студентски домови, посебно во Скопје“, изјави Ристовски.

Ристовски најави дека во текот на летниот период ќе се сменат лифтовите во сите студентски домови, а во врска со најавената изградба на двата нови студентски домови, тој изјави дека се разгледуваат понудите на компаниите такашто наскоро ќе се избере и компанија која ќе започне со изградба на студентскиот дом „Невена Георгиева Дуња“ во Скопје и студентскиот дом во рамките на универзитетот во Тетово.

Студентскиот дом „Гоце Делчев“ располага со сместувачки капацитет за 1.200 студенти, а Блокот „А“ кој моментално е под реконструкција располага со 314 легла.