Во 2010 година првпат победив на државен натпревар и станав претставник на Македонија на СП за бармени во Сингапур. Јас сум првиот учесник на СП од Македонија, истакна коктел мајсторот од Струга
Барменот е важна алка во угостителскиот свет. Ефектот што го создава барменот за гостите е еднаков на чинијата која излегува од кујната, импресијата е иста, дури некогаш и поголема, затоа што коктелот секогаш ќе ве потсетува на нешто добро, на изгледот, на вкусот, на местото што сте го посетиле, вели за својата професија Никола Јосески од Струга, еден од најдобрите бармени или коктел-мајстори во Македонија.
Во светот постојат барови во кои се поврзуваат различни видови храна со различни коктели изработени од автентични производи. Следејќи го светскиот тренд на спарување храна со коктели, Никола го изработи првото македонско мени со коктели составени само од автентични македонски производи и состојки кои тој самиот ги одгледува и обработува.
Првата средба со коктелите Никола ја имал во 2004 година во Струга.
- Македонец кој живее и работи во Романија, а е основач на романската асоцијација на бармени, отвори еден коктел-бар во Струга. Полека навлегов во тој систем, ме влечеше моментот на мешање пијалаци. Додека на другите оваа професија им беше попатна станица, јас посакав да се занимавам со неа подолго време. Во 2009 година ги запознав Филип Арнаудов и Дарко Ангелески од Асоцијација на бармени, во 2010 година првпат победив на државно учество и станав претставник на Македонија на СП за бармени во Сингапур. Јас сум првиот учесник на СП од Македонија - истакна коктел-мајсторот од Струга.
Последното учество на Никола на Светско првенство било во 2016 година во Јапонија, каде што одлично ја претставил Македонија во категоријата “bartender choice“. Тој вели дека ние како земја не заостануваме зад големите држави, кои се големи потрошувачи на алкохол и имаат развиено коктел-култура, како Јапонија, која во последно време изработува свои алкохолни производи.
- Мојот прв ментор Марјан Кукунешкоски ме научи на тајните на занаетот. Многу е битно кој колку ќе ви го пренесе занаетот за да имате желба да работите. Од Даре и Филип учам многу, тие секојдневно го работат тоа, а се и сопственици на бар. Барменот учи цело време, а за основите на занаетот се потребни две-три години континуирана работа и посетување курсеви и семинари во здружението на бармени. Ако ова го гледаш како професија, тогаш може добро да се живее, но мора постојано да се учи. Јас работам 16 години и уште учам - раскажа Никола, кој сега е меѓународен судија.
Индивидуалниот пристап, креативноста да се направи нешто свое и автентично, ја пробудиле идејата на барменот Јосески да направи коктели со состојки од нашето поднебје, на кои е многу горд.
- Идејата ја имам многу одамна, тлееше во мене. Долго време испробував нешто, правев домашни сирупи, ликери со автентични производи, корени, цветови, сè што има од нашиот крај. Таа идеја не е моја, туку глобален тренд на бармените и тренд на секој бар да понуди нешто различно. Во ресторанот „Агапе“, каде што работам, направивме едно мало автентично мени на кое сум горд затоа што е направено исклучиво од македонски производи: македонски ликери, македонски вина, ракии и домашни сирупи. Секогаш се собира свежо за декорација, свежа мајчина душица, свеж рузмарин. Кога е периодот го собирам, па го сушам за да го имам цела година - вели Никола.
На менито се наоѓаат коктели подготвени со ракија, коктели со струмичка мастика, со бели и црвени вина, коктели со вишновка, а сите разблажени со добар сируп од босилек и сируп од бозел, кој го има во изобилство во Струшко.
- Сè што има на тоа мени е наше производство. Почнуваме од собирање, сушење, складирање на билките и овошјето собрано од природа, подготвено за сушење. Има некои производи што се користат свежи. Имаме и многу добро пире од малинки, капинки и рибизли кое сами го правиме. На босилекот му треба ден-два да отстои, па да се направи сируп – истакна струшкиот бармен.
Никола прво го изработил менито, а потоа почнал да им дава имиња на коктелите, автентични за струшкото поднебје. Истражувајќи низ струшката чаршија, тој дошол до идеја своите коктели да ги крсти Водарка, Мостови, Такла, кој го носи името на легендарниот струшки скок од мостот на Црни Дрим, а така се родиле и коктелите Мугра и Берба.
- Минатото лето имавме контакт со странци затоа што рестриктивните мерки беа олабавени и колку-толку имаше туристичка сезона. Дури и на странците имињата им звучат интересно, затоа што не е нешто што го слушале. Само коктелот „Белегзија“ не е мој, тој е прв македонски официјален коктел, дело на Филип, но исто така е направен од македонски производи. Странците не знаат во принцип што е ракија, не знаат што е мастика и затоа им беше убаво. На македонските гости им беше почудно кога ги видоа состојките и не им беше сфатливо како се добива коктел со ракија или вино, но кога пробаа, реакцијата беше одлична - раскажува Никола за дебито на македонските коктели.
Никола вели дека секој коктел има база од алкохолен пијалак, има сок или разблажувач, содржи ликер за да го надополни вкусот и овошна и цветна декорација, која му дава егзотичен вкус. А коктелот Такла, кој е создаден од струмичка мастика, домашен сируп од бозел, шеќерен сируп и лимон-сода, бил најприфатен од гостите затоа што бил коктел кој може да се пие во секој период од денот и таа комбинација од состојки е цветна и природна.
- Кај нас се пие она за што се слушнало. Ние, бармените, гледаме да ги избегнуваме оние коктели во менијата како мохитото. Сакаме да направиме мени со коктели кои не ги знаат луѓето и ги спојуваме коктелите со храна. Со полесно месо или риба, ги препорачуваме коктелите Такла и Водарка, кои содржат помала концентрација на алкохол. Кога се јаде од традиционално мени со црвено месо, се нудат Староградски или Агапе коктел. Овие комбинации можеби се нелогични, но сите што ги пробале се воодушевиле - вели барменот.
Тајната состојка на необичните коктели на Никола Јосески не е некој цвет, ликер или алкохол, туку тоа што тој учествува во процесот на создавање на коктелот од почеток до крај.
- Уф, има многу тајни состојки. Јас никогаш не сум криел што сум ставал во коктелите, но тајната е во моментот кога ќе кажам дека правам сирупи, ликери, битери. Правам оранж битер, олд спајс битер, битери од сите зачини. Последно правев какао-битер со оригинално какао донесено од Африка. Направив какао-битер од какао кое буквално сам го печеш, сам го лупиш, сам го мелеш, сам го произведуваш. Тоа е моментот на тајната состојка кај моите коктели.
Професијата на Никола многу претрпе во пандемијава, која не стивнува ниту по 14 месеци. Таа ги затекна во период кога почнуваше летната сезона. Паузата од неработење за многу бармени значеше крај за нивната кариера, а идеите, натпреварите, семинарите и обуките секаде стагнираа и не се разви ништо ново.
Никола од јуни ќе работи на остров близу Задар. Ќе работи за компанија од Словачка која била воодушевена од неговата богата биографија и која во следните неколку месеци, некаде до средината на октомври, ќе му го овозможи да го прави тоа што најдобро го знае, коктели по спонтан избор на барменот.
- Кога некој ќе ми рече „прави по свој избор“, тогаш сум најкреативен и можам да најдам моментална инспирација. Но, ќе ги следам и трендовите во коктел-културата. Еден од нив е враќањето на голема врата на џин-тоникот, кој сега е најпродаван коктел во светот - откри барменот Никола Јосески.
фото: Приватна архива од Facebook и Instagram