Владата донесе одлука со која го овласти министерот за здравство да го потпише анексот за изменување и дополнување на Колективниот договор за здравствената дејност на Македонија со кој се врши зголемување на платите на вработените во јавните установи во здравството, почнувајќи со исплатата за март годинава.
- Министерот за здравство ќе го потпише анексот со репрезентативниот Самостоен синдикат за здравство, фармација и социјална заштита, со што се овозможува зголемување на платите на вработените во јавните установи во здравството. Според образложението од Министерството за здравство, покачувањата од 3.000 денари, 2.500 денари или 2.000 денари се однесуваат на сите вработени во јавните здравствени установи - соопшти попладнево владината прес-служба.
Владата ги овласти и директорите, односно в.д. директорите на јавните здравствени установи да ги потпишат поединечните колективни договори со кои се врши зголемување на платите на вработените во јавните установи во здравството, почнувајќи со исплатата за плата за март годинава.
Извор: МИА