Пред сто години шарените канаринци ги предупредиле луѓето за скриените опасности од копањето јаглен. Сега, експертите за пингвини велат дека овие птици ни ги покажуваат скриените опасности од согорувањето на јагленот и другите фосилни горива по начинот на кој се движат. И додека глобалното затоплување ја менува играта за преживување, еден посебен вид на пингвини на Антарктикот моделира потресна лекција за човештвото: приспособи се или умри и направи го тоа брзо!
Поради загревањето на Јужниот Океан од климатската криза, пингвините полека исчезнуваат. Додека некои ги напуштаат местата за гнездење, колониите на оние што одбиваат да се движат пропаѓаат.
- Тоа е неверојатно. Како екологисти, знаеме дека животните го менуваат своето движење во текот на геолошките времиња и исчезнуваат во една област, но колонизираат друга. Но, ретко е да се види таа динамика да се случува во текот на кариерата на еден еколог - вели Хедер Линч од Катедрата за екологија и еволуција на Универзитетот „Стони Брук“.
Заедно со фоките, морските птици и беззабите китови, пингвините главно јадат антарктички крил. За разлика од Арктикот, каде што морскиот мраз постојано се намалува, морскиот мраз на Антарктикот имаше и подеми и падови, иако неодамна научниците забележале тренд на опаѓање.
На крајот на зимата на јужната хемисфера, во септември 2014 година, околу Антарктикот лебделе повеќе од 19 милиони квадратни километри замрзната солена вода, рекордно високо ниво, така што многу видови како грбавите китови се хранеле со крил и навистина напредувале.
Но, на почетокот на оваа година морскиот мраз достигна рекордно ниско ниво од помалку од 1,5 милион квадратни километри, соборувајќи го претходниот рекорд поставен минатата година.
- Температурна промена од 1 степен во умерено опкружување како Велика Британија или САД не загрижува никого. Не ви го уништува денот. Но, во некои области 1 степен прави огромна разлика, како на пример дали има снежна покривка на местото што служи за размножување. Тоа е сосема поинакво живеалиште - објаснува Том Харт, професор по биологија на Универзитетот „Оксфорд Брукс“.
Користејќи сателити, камери, наука и вештачка интелигенција за следење милиони пингвини низ Антарктикот, Харт и Линч велат дека научиле лекција за еволуција и адаптација токму од пингвините. Додека аделиските пингвини и антарктичките пингвини (Pygoscelis antarctica) остануваат заглавени во нивните начини на живеење, пофлексибилните папуански пингвини се движат сè подалеку на југ. И како што покажуваат подготвеност да бркаат нов плен или да го напуштат гнездото за да си ги зголемат шансите за преживување, нивниот број расте.
- Овие пингвини се големи победници на климатските промени на Антарктикот. Тие се совршено среќни што ја искористуваат предноста на затоплувањето на Антарктикот. Не им пречи што станува повлажно. За разлика од нив, аделиските пингвини и антарктичките пингвини се соочуваат со намалена популација за дури 80 отсто - вели Линч.
- Адаптацијата значи неколку работи. Тоа значи дека животното треба да е навистина цврсто во тешки природни средини, но исто така значи да преземе нешто кога работите не одат како што треба - вели Харт.
- Тука има лекција за сите нас. Ако се држиме до она што отсекогаш сме го правеле, нема да испадне добро за нас. Само затоа што Менхетен отсекогаш бил таму каде што е, дали има смисла да биде таму за 200 или 300 години? Не знам. Но, мислам дека ќе имаме корист ако бидеме флексибилни. И мислам дека тоа ни го кажуваат папуанските пингвини.
Извор:
CNN
Фото:
Wikipedia