Полицијата во Кина спасила околу 1.000 мачки од камион што се движел кон кланица. Тоа било дел од нелегалната трговија со месо од мачки што се продава како свинско или јагнешко, објавија тамошните медиуми.
Акцијата се одвивала во Џангјаганг, во источната кинеска област Џијангсу. По дојава од очевидци и активисти за заштита на животните, властите пресретнале возило што се користело за собирање и пренос на уловени мачки. Полицијата и земјоделските власти ги сместиле спасените мачки во блиско засолниште.
Без интервенција на активистите, фатените мачки би биле заклани и испратени на југот на Кина каде што од нивното месо ќе се правеле „свински и јагнешки“ ражен, колбаси итн., според наводите. А, од ваква пратка обично приходот е 20.000 евра.
Извор: МИА