Во последно време, компаниите се соочуваат со рапиден технолошки развој на ИТ индустријата, кој не
се мери со години, туку со минути и секунди.
Некои од нив се обидуваат да инвестираат во својот развој и сами да ги обезбедат потребните ИТ
решенија, но со тек на време, тоа се покажува како неефикасно и комплексно. Потребните вложувања
во нови кадри и во нивна дообука, воведувањето на нова опрема и нејзино одржување, претставува
дополнителен ангажман на ресурси и време за компаниите што може да ги оддалечи од главните цели
на нивното работење. Затоа компаниите во светот избираат да ангажираат специјализирани ИТ
компании по потреба или пак да склучат со нив договори за тн. управувани услуги (Managed Services),
кои се базираат на редовно опслужување и партнерски однос помеѓу страните.
Која од двете опции на ангажирање надворешни услуги е подобра?
Ангажирањето на надворешни ИТ даватели на услуги на повик или по потреба, овозможува низа
предности: брз пристап до потребните услуги, вештини и знаења, намалување на трошоците за
вработување на нови кадри, плаќање по реализирана услуга, задржување на истата структура на
организацијата и оперативниот модел на работење, полесно склучување на договорите и сл.
Но, во случај на нивно често и редовно користење, тие стануваат доста скапа алатка, која создава услови
за беспланско работење и поголеми трошоци за надзор и управување. Најголемиот недостаток на
користењето на овој тип на услуги е што компаниите немаат увид во новите знаења/искуства стекнати
во текот на работењето на давателот на услуги, при што компанијата мора одново и одново да го
ангажира давателот на услуги или надворешниот ИТ тим чија што обврска се сведува само на
реализацијата на одделна услуга, без одговорност за нејзиниот успех и иден исход.
Оттука, повременото ангажирање на надворешен стручен кадар за одделни ИТ услуги има своја
функција и место во одреден момент на работењето, но доколку стане постојан оперативен модел,
создава поголеми трошоци и ризик во остварувањето на крајната цел - справувањето со разноликоста и
комплексноста на ИТ потребите и нивното брзо адаптирање кон најновите стандарди.
Втората опција е склучување на договор за управувани услуги со специјализираните ИТ компании, со
што се обезбедуваат предностите на претходниот модел, а се премостуваат неговите недостатоци.
Со управуваните услуги провајдерот го презема ризикот и одговорноста за остварување на
договорените резултати и цели, за однапред утврдена фиксна цена, што го поттикнува да работи
попродуктивно и проактивно за да ги оствари истите. Постои можност за поголема контрола и
мерливост на процесите како поради нивната документираност, така и преку можноста за менување на
обемот и нивото на потребните услуги.
Сето тоа на компаниите - корисници на управуваните услуги, им носи подобри можности за
предвидување планирање на трошоците, поголема сигурност во испорака на услугата, а со тоа и повеќе
време и ресурси да се посветат на планирањето на своите развојни потреби и стратешки цели.
Управуваните услуги земаат сé поголем замав во светот
Видот на управуваните услуги и моделите на наплата, зависат пред сé од потребите и целите на
компанијата, од тоа дали се однесуваат на непречено функционирање, или се потребни за развој или
пак за трансформирање на работењето на компанијата.
Денес, мотивите за користење на надворешни ИТ услуги дури и ги надминуваат првичните мотиви за
заштеда на трошоците, а сè повеќе се однесуваат на ефикасноста на процесите, конкурентските
предности, иновирањето и освојувањето на нови пазари. Оттаму и промената на стратегиите во
користењето на надворешните услуги и нивно трансформирање во долгорочни партнерски односи - т.н.
управувани услуги што доведува до многукратно зголемување на приходите и добивката.
Само како пример: компанијата Qantas во соработка со IBM го скрати времето на чекирање на
патниците за над 90% пореку воведувањето на смарт картички базирани на нови технологии, а Marriott
меѓународниот ланец на хотели, со помош на услугите на Xerox ги подобри своите финансиски текови
низ целиот свет.Конгломератот GE (General Electric) во соработка со Cisco, воспостави платформа за
поврзување на вработените и информациите, со цел поттикнување на иновативноста и побрзо
решавање на работите во рамките на компанијата.
ИТ компаниите во светот се повеќе ги нудат управуваните услуги и услуги базирани на партнерска
соработка, токму поради можноста да реагираат навремено и проактивно за развојот на нови
решенија адаптирани според потребите на клиентите. Почнувајќи од надзорот и контролата на
функционирањето, преку грижата за постојаното надоградување и подобрување на оперативната
ефикасност, сè до новите кориснички решенија.
На компаниите им останува да се фокусираат повеќе на водењето на бизнисот и на потребите на
клиентите, отколку на технологијата.