Има само 13 години, а веќе има сработено повеќе проекти од областа на роботиката. Младиот Орхан Багашов од Тетово е посветен на технологијата уште од мали нозе, особено интересирајќи се за роботиката. Учествува на натпревари и постојано добива награди и признанија.
Иако во Македонија оваа гранка на машинското инженерство не е развиена, Орхан не се откажува од неговите цели и напорно работи на нови проекти. Негов сон е да изработи интелигентен робот.
Факултети.мк: Од кога почна да се интересираш за роботика и електроника?
Орхан Багашов:Чуствувам како од секогаш да сум бил заинтересиран околу технологијата, конкретно роботиката, но поинтензивно почнав да се занимавам од 8 годишна возраст.
Факултети.мк: Што всушност претставува роботиката?
Орхан Багашов: Роботика е гранка на машинско инжинерство, електротехника и компјутерски науки.
Факултети.мк: Има ли некој кој ти помогна да ја изучуваш роботиката или сам се надоградуваш постојано?
Орхан Багашов: Поголемиот дел од моето знаење го имам стекнато со помош на интернетот, но го посетувам и курсот по електроника при Народна техника, Скопје. Исто така бев дел од тимот за роботика при адакемијата “School of the Future”, под менторство на Локи Фериер – студент на МИТ.
Факултети.мк:Што имаш досега сработено?
Орхан Багашов: Имам поголем број на сработени проекти, но би ги издвоил следните: ЦНЦ (компјутерска нумеричка контрола), 3Д ЛЕД коцка и проектот на кој сеуште работам - 3Д печатач.
Факултети.мк: Колку време е потребно за да се изработи одреден проект и од што зависи изработката?
Орхан Багашов:Секој проект си има своја тежина и според тоа зависи колку време е потребно за да се изработи. Нормално, постојат и други фактори кои влијаат врз процесот на работа, како на пример: потребни делови кои не можат да се најдат и купат во Македонија. Конкретно, процесот на изработка на 3Д печатачот започна минатата година и трае се уште.
Факултети.мк: Како се снабдуваш со потребните материјали за изработка?
Орхан Багашов: Поголемиот дел од потребните материјали ги купувам преку интернет, од странски компании.
Факултети.мк: Имаш ли учествувано на натпревари?
Орхан Багашов: Учествувам веќе неколку години на општинските, регионалните и републичките натпревари на: ,,Млади техничари и иноватори” и ,,Млади техничари и природници”.
Факултети.мк: Колку награди имаш освоено?
Орхан Багашов: Над 5, од гореспоменатите натпревари. Повеќето се први места.
Факултети.мк: Колку наградите те поттикнуваат да работиш повеќе и да се интересираш за роботика?
Орхан Багашов: Често поттикнуваат, но без разлика на наградите, љубовта и мотивацијата за работа во таа област е еднакво голема и силна.
Факултети.мк: Од кого добиваш најмногу поддршка за она што го работиш?
Орхан Багашов:Најмногу поддршка добивам од родителите, но исто така и од курсот кој го посетувам и пријателите.
Факултети.мк:Планираш ли и професионално да се бавиш со ова?
Орхан Багашов:Секако, но првично би сакал да учам и студирам на школа која ќе ми овозможи квалитетно образование и знаење, како во теоретскиот дел, така и во практичниот.
Факултети.мк:Според тебе, колку во Македонија е развиена оваа гранка?
Орхан Багашов: Според тоа што го знам, оваа гранка кај нас е прилично слабо развиена.
Факултети.мк:Дали има доволно можности и поддршка од самата држава за луѓето кои сакаат да се бават со ова (стипендии, грантови и слично)? Колку си информиран во врска со ова?
Орхан Багашов: Верувам дека има, иако јас сеуште не земам ништо такво.
Факултети.мк: Дали има заинтересирани за роботика од твоите врсници?
Орхан Багашов: Познавам заинтересирани млади, но тоа се повеќе средношколци и студенти, а не основци.
Факултети.мк: На кое твое дело си најмногу горд?
Орхан Багашов: Засега би рекол ЦНЦ машината, но сепак помина долго време откако го завршив тој проект и се посветив на изработката на 3Д печатачот. Кога ќе го завршам, верувам дека ќе се гордеам најмногу со него.
Факултети.мк: На што работиш во моментов?
Орхан Багашов: Во моментов работам на токму на тоа. Биполарен 3Д печатач. Тоа е доста покомплициран 3Д печатач, во споредба со другите, според начинот на кој што печати. Ова е нов вид на 3Д печатач.
Факултети.мк: Имаш ли некоја цел која мечтаеш да ја постигнеш, некој личен твој изум кој сакаш да го реализираш?
Орхан Багашов: Мојата најголема желба и цел е да направам интелегентен робот и софтвер со изглед на човечко тело.
Факултети.мк: Планираш ли твоите дела да ги претставиш на некој начин и на пошироката јавност, освен на натпревари?
Орхан Багашов: Секако, доколку се покажат како корисни и функсионални. Би бил среќен ако успеам да креирам нешто што би ни помогнало на сите.
