Велика Британија по грешка испратила писма до граѓаните на Европската Унија во кои пишувало дека треба да ја напуштат земјата. Ова е навистина огромна грешка, особено во време кога се преговара за правата на граѓаните од земјите на ЕУ.

Министерството за внатрешни работи соопшти дека истражува како на граѓаните од другите земји-членки на ЕУ им биле испратени околу 100 писма во кои се наведува дека според законот за имиграција, мора да ја напуштат земјата.

„По грешка се испратени голем број писма, па се обидуваме итно да утврдиме зошто се случило тоа. Се обидуваме да ги контактираме сите што добиле писмо за да им објасниме да ја игнорираат содржината на писмото“, вели портпаролот на министерството.

„Сакаме да бидеме јасни и да порачаме дека правата на граѓаните на ЕУ што живеат во Велика Британија остануваат непроменети“, додава портпаролот.

Иако Британија ветува дека ќе биде дарежлива кога станува збор за правата на граѓаните на ЕУ после Брегзитот, засега сè уште нема договор за тоа како ќе се заштитат нивните права.