Универзитетот „Св. Климент Охридски“ - Битола организира Меѓународен научен собир на тема: „Мултидисциплинарен пристап кон целите за одржлив развој“ што УКЛО го организира по повод Светскиот ден на науката.
Во два панела, дваесетина научници и професори од различни профили низ научен пристап ги актуализираа 17. глобални цели кои се дефинирани во агендата 2030 на ОН. Меѓу нив, посебна тежина на конференцијата ѝ обезбедија пленарните излагања на д-р Метју С. Хал, истражувачки професор од Вирџинија, САД, и д-р Ентони М. Гулд, редовен професор од Квебек, Канада.
Собирот е меѓу поважните академски активности што овозможуваат третирање на целите на ОН за одржлив развој, особено затоа што нивното исполување е од исклучително значење како за локалните заедници така и за Универзитетот и глобалната средина, истакнува проректорот за наука на УКЛО, проф. д-р Горан Илиќ.
Министерката за култура на Република Северна Македонија, Бисера Костадиновска-Стојчевска, учесник на меѓународниот настан со оцена: „Годишната научна конференција на УКЛО е собир од каде што ќе се трасира патеката на единството, соработка и визијата за трансформација, остварувајќи ги целите на Обединетите нации до 2030 година. Во тие процеси на прогрес, културата има голема улога, зашто културата е обединувачки фактор кој ги поврзува сите категории граѓани, не правејќи никакви поделби. Културата го афирмира слободниот творечки дух, креативноста и инспиративноста.
Согласно нашата Стратегија, институционалната култура во државата во споредба со минатото е поотворена, поконкурентна и станува активен и препознатлив учесник во регионалната, европската и светска култура.
Културната разновидност, богатото културно наследство што го имаме, оригиналноста во творештвото создаваат услови за вклученост на државата во реализација на глобалните политики за одржлив развој и остварување на целите на Обединетите нации.
Според мислењата на научниот и академски кадар, Универзитетот „Св. Климент Охридски“ - Битола со одржувањето на Меѓународен научен собир ја продолжува востановената академска „мобилизација“ за афирмацијата на концептот за поставување на науката и научната мисла во срцевината на сите процеси за глобален одржлив развој, што беше посочено и во онлајн обраќањето на ректорот, проф. д-р Игор Неделковски.
Дополнително, од научниот собир, најдобро селектираните трудови ќе бидат објавени во меѓународното научно списание на УКЛО ,,Хоризонти“. Инаку, станува збор за втора конференција на која УКЛО ги разработува и на научен начин ги операционализира целите на ОН за одржлив развој. На Меѓународниот научен собир што се одржа на 17. 11. 2023 г. учество зедоа и проректорите, проф. д-р Јасмина Буневска-Талевска, проф. д-р Цветко Андреески и претседателот на Универзитетскиот сенат, проф. д-р Николче Јанкуловски.
(Комерцијална објава)