Покрај Трпчески, тимот на „Македонисимо“ го сочинуваат и Александар Краповски на виолина, Александар Сомов на виолончело, на кларинет, саксофон и кавал свири Хидан Мамудов, а зад удиралките е Влатко Нушев. Преработките на традиционалната македонска музика испреплетени во различни стилови се на македонскиот композитор Панде Шахов.

Проектот, во чии рамки на оригинален начин се обработува македонската народна музика, според Трпчески, прв пат пред македонската публика ќе биде претставен во областа Малесија, на планината Караорман, место од каде што излегле многу посветени Македонци кои се бореле за своето право, корен и слобода на својата земја.

- Тешко е да се најдат зборови за да се изрази задоволството и среќата што „Македонисимо“, кој е посветен на македонскиот народ, си доаѓа дома по петгодишно суштествување на странските сцени. Посебно ми импонира фактот што првото претставување ќе се одржи во родното село на мојот татко, Збажди, во бунтовна Малесија. Во една револуционерна околија на планината Караорман, која израснала многу паметни луѓе и посветени Македонци, кои се бореле за своето право, за својот корен, слобода и за својата земја. Нешто што очигледно денеска многу ѝ недостига на Македонија или на одреден број луѓе - истакна Трпчески во изјава за МИА.

Во селото Збажди, минувајќи ги летните одмори кај неговите баба и дедо, пораснал во опкружување кое му ја довело блиску сржта на македонската народна музика.

- Спомените кои многу силно се поврзани со постоењето на нашата музика и луѓето од Збажди и околината покажуваат дека македонскиот дух сè уште постои. Таа возбуда, тој порив, жар со кој црковниот одбор во Збажди заедно со цела екипа ја покажува во овој момент за огромниот зафат за одржување на концертот е нешто исклучително и треба да биде пример за она како треба да се сака својата земја, да се сака нешто да се направи, а она што се прави е за доброто на народот - посочи Трпчески.

Извор: МИА