Во Лос Анџелес, каде што градската власт се обидува да ги поттикне сопствениците на куќи да изградат повеќе придружни живеалишта, просечната цена за изградба на нова куќа почнува од 150.000 долари и се движи до околу 350.000 долари, не вклучувајќи ги градежните планови, инженерските работи и другите трошоци.
Стартапот „Азур принтед хоумс“ зазема поинаков пристап: со 3Д-печатење на покривот, подот и на ѕидовите одо рециклирана пластика и градење на остатокот од домот во фабрика ги одржува трошоците пониски. Едноставно студио во двор, со мала кујна и бања, почнува од 39.900 долари. Oсновата, испораката, приклучоците за комунални услуги и другите трошоци додаваат околу 25 до 30 отсто на вкупниот износ, но сепак е далеку поевтино од повеќето алтернативи.
Во својата фабрика во Калвер Сити, компанијата се подготвува да ги печати своите први домови. 3Д-печатачот во еден ден може да ги испечати обвивката на куќата, подот, покривот и двата ѕида. Во ѕидовите печатачот вклучува канали за водовод и жици. Двата други ѕида не се 3Д-печатени, туку претходно дизајнирани панели со врати и прозорци.
„Азур“ користи лесен материјал за да може да се изградат домови во неговата фабрика, а потоа да се доставуваат до локацијата. И 3Д-печатењето и монтажната конструкција во фабриката може да го забрзаат времето на изградба и да ја намалат работната сила, со што на крај би се намалиле трошоците. Освен тоа, компанијата сакаше да користи отпаден материјал и да го пренамени отпадниот материјал што предизвикува проблем на глобално ниво. Така, „Азур“ користи околу 100.000 рециклирани шишиња за вода. Компанијата работи со различни добавувачи и вели дека нема недостиг, барем засега.
Во еден од своите први проекти компанијата работи со инвеститор за изградба на мала група викендички што може да се користат за краткорочно изнајмување, а ќе работи и преку листа на чекање. Освен тоа, во разговори е и со групи кои сакаат да изградат мали домови за бездомници.
Извор:
Fast Company
Фото: Azure Printed Homes