„Спејс екс“ во последните шест месеци контролирано отстрани од орбитата 260 старлинк-сателити, потврдува полугодишниот извештај што компанијата го поднесе до американската Федерална комисија за комуникации (ФЦЦ).

Станува збор за планиран процес на отстранување на сателитите на кои им истекол работниот век, а кој завршува со нивно целосно согорување во атмосферата на Земјата.

Според извештајот, меѓу декември 2025 и мај 2026 година деорбитирани се вкупно 260 сателити. 176 од нив припаѓале на првата генерација на соѕвездието „Старлинк“, додека преостанатите биле сателити од втората генерација. Во истиот период, од активна употреба се повлечени уште 349 сателити, кои во текот на следните месеци исто така ќе бидат контролирано спуштени во атмосферата.

„Старлинк“ управува со најголемото светско сателитско соѕвездие со повеќе од 10.000 активни сателити во ниската орбита на Земјата. Истовремено, „Спејс екс“ продолжува да ја шири мрежата за да поддржи нови услуги, вклучувајќи го и „Старлинк мобајл“, кој треба да овозможи директна сателитска поврзаност со обичните мобилни телефони.

Секој сателит на „Старлинк“ е проектиран за работен век од приближно пет години. Откако ќе го потроши погонското гориво, ги користи преостанатите резерви за контролирано излегување од орбитата. Притоа, сателитот постепено ја намалува орбитата и влегува во атмосферата на Земјата, каде што поради екстремното триење целосно согорува.

Со оглед на големината на соѕвездието, „Спејс екс“ речиси секојдневно отстранува поединечни сателити од орбитата. Во претходниот извештаен период, меѓу декември 2024 и мај 2025 година, компанијата деорбитирала повеќе од 470 сателити на „Старлинк“.