Македонскиот театарски режисер Дејан Пројковски продолжува да освојува награди откако претставата „Ана Каренина“ според романот на Толстој, која ја режира тој, е прогласена за апсолутен победник на годинешниот фестивал „Театарска пролет“ во Шабац, Србија. Претставата е во продукција на Новосадскиот театар (Новосадското народно позориште), Овој театарски продукт на Пројковски се закити со 22 награди во изминатите две години во Србија и пошироко.
„Ана Каренина“ својата премиера ја имаше во ноември 2019 година, а ги понесе наградите на сите релевантни фестивали во Србија, како што се фестивалот на професионални театри на Војводина, „Тврѓава“ фестивал, на фестивалот „Борини театарски денови“ во Врање…
Претставата на Пројковски, кој е еден од најнаградуваните и најпродуктивни македонски театарски режисери на Балканот, освен што е прогласена за најдобра во целина, доби и награда за најдобра режија. За најдобар актер е прогласен Арпад Месарош, кој го толкува ликот на Алексеј Вронски, додека наградата за најдобра актерка ја доби Тимеа Филеп, која во претставата „Ана Каренина“ го толкува главниот лик.
Фото: ФБ-страница на Дејан Пројковски