„Нетфликс“ ќе почне да прикажува нова серија зад која стои „Амблин телевижн“, продуцентската куќа на еден од најпознатите холивудски режисери - Стивен Спилберг. Серијата се занимава со вистински приказни за средби со вонземјани и искуства од прва рака.

Легендарниот режисер често ѝ се враќа на научната фантастика, со играни филмови кои не само што ја обликуваа кинематографијата, туку засекогаш имаат влијание врз популарната култура. Неговиот нов проект „Средби“ (Encounters), кој ќе биде објавен на „Нетфликс“ на 27 септември, ќе биде негов последен обид да ве натера да верувате во вонземјани.

Секоја епизода раскажува посебна приказна: чудни светла на небото над мало гратче во Тексас, подводни вселенски летала што прогонуваат крајбрежно село во Велс, средба на вонземјани со деца во Зимбабве и нечовечка интелигенција што наводно се мешала во работата на нуклеарната централа во Јапонија.

Новиот документарен серијал доаѓа во интересно време. Американската влада практично го потврди постоењето на она што сега се нарекуваат Неидентификувани воздушни феномени, откако тројца свиркачи, поранешен разузнавач и двајца поранешни пилоти, сведочеа пред Конгресот за средби со вонземјани во текот на нивните кариери.

Извор: Idesh
Насловна фотографија: Pixabay