Сè повеќе луѓе стануваат свесни дека бројката од 10.000 чекори дневно не е златен стандард за физичка активност. Всушност, станува збор за многу успешна, но и малку погрешно разбрана маркетинг-кампања што брзо се проширила и натерала милиони луѓе да ги гледаат своите фитнес-следачи при секое одење.

Иако некои истражувања покажале дека 7.000 чекори дневно се доволни за здрав живот, една метаанализа од 2022 година објавена во списанието „Лансет“ открива дека придобивки за здравјето се можни и со помалку чекори, и тоа во зависност од возраста.

Што покажува најновото истражување?

Метаанализата опфатила 15 студии: седум објавени и осум необјавени и открила дека поголем број дневни чекори е поврзано со намален ризик од смртност. Сепак, ефектот се стабилизирал кај: 6.000 до 8.000 чекори дневно за лица постари од 60 години и 8.000 до 10.000 чекори дневно за лица под 60 години.

Истовремено, истражувачите заклучиле дека нема доволно конзистентни докази дека темпото (интензитетот) на чекорењето игра улога во намалување на смртноста, освен вкупниот број на чекори. Тоа укажува на крива поврзаност помеѓу чекорењето и општата смртност.

Сепак, друго истражување покажа дека и брзината може да има значење: темпо од 100 чекори во минута може да се смета за умерено интензивна активност што го подобрува кардиоваскуларното здравје.

Дали постои апсолутен минимум?

Според метаанализа од 2023 година, објавена во „Јуропиан журнал оф привентив кардиолоџи“, одговорот е да. Анализата вклучила над 226.000 испитаници и утврдила:

- 2.337 чекори дневно го намалуваат ризикот од смртност поврзана со срцеви заболувања;
- 3.867 чекори дневно го намалуваат ризикот од сите видови смртност.

Со други зборови, ако правите помалку од околу 2.300 чекори дневно, го зголемувате ризикот од срцев удар, мозочен удар или слични кардиоваскуларни настани. Но со зголемување на бројот на чекори, ризикот постепено се намалува.

Дали треба да го зголемите бројот на чекори?

Ако немате многу време, неколку вежби може да ви помогнат да го достигнете минимумот и да се запознаете и со терминот NEAT (Non-Exercise Activity Thermogenesis), кој ги опфаќа сите активности, како што се играње со деца, носење торби од пазар или користење стоечко биро додека работите.

Истото истражување од 2023 година открило дека:

- зголемување од 1.000 чекори дневно го намалува вкупниот ризик од смртност за 15 отсто;
- зголемување од 500 чекори дневно го намалува кардиоваскуларниот ризик за 7 отсто;

Воедно, сегашните глобални здравствени препораки се најмалку 150 минути аеробна активност неделно.

Пешачењето, особено во природа, е поврзано со подобрено расположение, зголемена креативност, намалена анксиозност и поретки епизоди на депресија. Исто така, пешачењето се смета за форма на аеробна активност.

Ако сакате да ја зголемите својата дневна активност без да ја доживеете како тренинг, пробајте интуитивно пешачење или пешачење со боја (color walking) – активности што можат да ви помогнат да го зголемите бројот на чекори на природен начин.

Запомнете, не мора сите чекори да ги направите одеднаш. На пример, прошетка од 5 километри може да ви одземе околу еден час и да ви донесе 6.000 до 7.500 чекори, што значи дека можете да ја распоредите во неколку помали сесии во текот на денот. Еден од авторите на истражувањето препорачува т.н. „вежбање во мали порции“ како ефикасна стратегија.

Извор: Tomsguide.com
Фото: Freepik