Две години по трагичната несреќа на подморницата „Титан“, во која загинаа Стоктон Раш и уште четворица патници, мистериозен милијардер најавува нова експедиција до остатоците на „Титаник“.

Пред две години Стоктон Раш загина додека ја управуваше својата експериментална подморница „Титан“ кон местото каде што се наоѓа „Титаник“. Со него животот го загубија и уште четири жртви. Сега еден милијардер се подготвува за сличен подвиг вреден 10 милиони долари, но сите детали се чуваат во строга тајност.

Спуштањето ќе чини десет милиони долари

- Слушнав дека некој ќе оди до „Титаник“ за неколку недели. Не можам премногу да откријам, но можам да кажам дека станува збор за милијардер. Спуштањето ќе го чини десет милиони долари. Сигурно би го препознале неговото име. Тој самиот сака да објави дека е првата личност која се спуштила до „Титаник“ по трагедијата - изјавил добро информиран извор за веб-страницата „Поуст“, додавајќи дека не сака да го расипе изненадувањето.

- Освен што остатоците имаат историско значење, фактот дека се наоѓаат на таква длабочина ги прави особено фасцинантни за посета - вели Патрик Лејхи, извршен директор на компанијата „Трајтон сабмаринс“, која моментално развива нова комерцијално достапна подморница способна за вакво патување.

Кој ќе биде следниот што ќе го посети „Титаник“?

Пред повеќе од една година Би-би-си објави дека американски милијардер кој го стекнал своето богатство преку луксузни недвижности, заедно со истражувач на морските длабочини, планира патување со подморница до остатоците од „Титаник“.

Претприемачот и авантурист од Охајо, Лари Конор, и Патрик Лејхи, коосновач на „Трајтон сабмаринс“, најавија дека сакаат да се спуштат на длабочина од околу 3.800 метри во северниот Атлантик за да ги истражат легендарните остатоци од потонатиот брод.

Двајцата планираат да ја користат подморницата „Трајтон 4.000/2 абисал експлорер“. Бројот 4.000 означува длабочина во метри до која пловилото може безбедно да се спушти. Тие порачаа дека ќе се спуштат до „Титаник“ дури кога подморницата ќе добие целосна сертификација од релевантната поморска организација, а временската рамка на експедицијата сè уште не е одредена.

Извор: 6yka.com
Фото: YouTube/OceanGate Expeditions/Screenshot