Второто полугодие во училиштата на територијата на Гостивар почна со околу 200 деца помалку во школските клупи, пренесува „Гостивар прес“ повикувајќи се на податоците од општинскиот Сектор за образование.

-Во второто полугодие бројката на ученици во училиштата е намалена за околу 200, а причината за отпишувањето е заминување во странство - наведуваат од Секторот.

По тринеделниот зимски распуст, учениците вчера се вратија на настава.

- Сите училишта го почнаа второто полугодие подготвени, снабдени се со доволно греење, извршено е чистење и дезинфицирање на просториите. На првиот ден не се регистрирани многу отсуства поради вирусот на грип - информира раководителката на Секторот за образование, Аслијан Снопче.

Во основните и во средни училишта во Гостивар настава посетуваат речиси 10.000 ученици.