Лапонија, позната пред сè како дом на Дедо Мраз и по своите пејзажи што потсетуваат на волшебниот свет на Нарнија, ги повикува туристите ова лето да ги заменат возењата со ирваси со повеќемесечна потрага по скриено златo.
Учесниците ќе ги истражуваат патеките и знаменитостите на Леви, туристички центар во Северна Финска познат по своите зимски скијачки терени и поларната светлина. Таму трагачите по среќа ќе бараат златна прачка вредна 20.000 евра.
Потрагата наречена „Лов под полноќното сонце“ започнува на 18 јуни во туристичкиот центар Леви, соопшти организацијата „Визит Леви“ во вторникот.
Учесниците ќе можат да ја преземат првата трага и да се регистрираат за потрагата во центарот за посетители. Потоа ќе добиваат нови насоки што ќе ги водат низ локалните патеки, атракции и знаменитости, сè поблиску до скриеното богатство.
Потрагата „Лов под полноќното сонце“ се организира во соработка со компанијата „Агнико игл Финланд“, рударска компанија за експлоатација на злато со седиште во Китила, како и со скијачкиот центар Леви.
На учесниците им се препорачува да се движат одговорно, да останат во рамките на дозволените подрачја и да ја почитуваат природната средина. Организаторите нагласуваат дека потрагата не бара копање, ниту какво било нарушување на теренот.
Феноменот на полноќното сонце
Леви, сместен северно од Арктичкиот Круг, е познат како едно од водечките скијачки места во Финска и популарна зимска дестинација.
Во текот на летните месеци регионот го доживува феноменот на полноќното сонце, па во одредени периоди Лапонија има дневна светлина 24 часа без прекин.
- Леви е најпознат по зимската сезона, но летото таму сè уште е недоволно искористено. Сакаме на патниците да им понудиме нова причина да го посетат Леви во периодот кога сонцето никогаш не заоѓа и кога планинскиот пејзаж покажува сосема поинакво лице - вели Сату Песонен, извршна директорка на организацијата „Визит Леви“.
Извор:
Nova.rs
Фото: Magnific