Туризмот во Европа е во подем. Универзитетот „Џорџ Вашингтон“ објави дека 747 милиони патници ја посетиле Европа во 2024 година, што е повеќе од населението на Европа. Ова врши притисок врз локалната инфраструктура, животната средина и заедниците. Повеќето туристи доаѓаат во Франција и Шпанија.
Сепак, иако двете земји имаат сличен број на посетители, во Шпанија локалниот отпор кон туризмот е многу поизразен отколку во Франција. Од протестите во Барселона до транспарентите на Ибица, локалното население во Шпанија јасно го искажува своето незадоволство. Во меѓувреме, Франција - позната по честите протести од различни причини - останува релативно мирна кога станува збор за туризмот. Зошто?
Франција е најпосетуваната земја во светот
Во 2024 година Франција го зазеде првото место како најпосетувана земја во светот, со рекордни 100 милиони патници, што донесе зголемување од 12 проценти на приходите од туризам во споредба со претходната година. Податоците од Светскиот совет за патувања и туризам (ВТТЦ) покажуваат дека Франција би можела да сруши нови рекорди во 2025 година.
- Франција продолжува да поставува стандарди во светскиот туризам. По историската 2024 година, се очекува секторот да продолжи да расте во 2025 година и понатаму. Голем дел од овој успех може да се припише на Олимписките и Параолимписките игри во 2024 година. ВТТЦ предвидува дека туризмот ќе вработи еден од 10 работници во Франција во 2025 година - изјави Џулија Симпсон, претседател и извршен директор на ВТТЦ.
Шпанија не заостануваше многу - имаше 94 милиони патници. Тоа се само шест милиони помалку од Франција. Исто така, забележа зголемување од 10 проценти на приходите од туризам во споредба со претходната година.
Зошто Шпанците протестираат, а Французите не?
Зошто шпанските жители се погласни во противењето на растечкиот туризам? Во исто време во Франција - иако неодамна имаше штрајк во „Лувр“ поради неподносливите толпи - има релативно малку протести.
Во текот на 2024 година локалното население во Шпанија организира координирани протести против туристите во Барселона и Мадрид, како и на Канарските Острови. Во средината на јуни 2025 година илјадници луѓе излегоа на улиците на Мадрид и Барселона за да протестираат, држејќи транспаренти со пораките: „Масовниот туризам го убива градот“ и „Нивната алчност го носи нашиот пад“.
Протести се одржаа и во други делови од земјата, вклучувајќи ги Ибица, Малага, Палма де Мајорка, Сан Себастијан и Гранада.
Франција има различна туристичка структура од Шпанија
Постојат неколку причини што можат да објаснат зошто локалниот отпор кон туризмот е многу помал во Франција. Најважно е што голем дел од туризмот во Франција доаѓа од самата земја. Француските граѓани носат помеѓу 50 и 70 проценти од приходите од туризам бидејќи често ги поминуваат своите годишни одмори во сопствената земја. Ова е дополнително олеснето од фактот што Франција има пристап до Атлантскиот Океан, Средоземното Море, како и планинските венци на Алпите и Пиринеите.
Остатокот од посетителите на Франција доаѓаат главно од Белгија, Велика Британија, Германија, Швајцарија и САД. Бројот на туристи од Азија е далеку под нивоата пред пандемијата. Бројот на кинески туристи е сè уште за 60 проценти помал отколку пред 2020 година. Статистиката може да го преувеличува и бројот на меѓународни посетители бидејќи Франција е важна транзитна точка помеѓу Северна и Јужна Европа.
Статистиката покажува дека туристите трошат повеќе кога ја посетуваат Шпанија. Ова ја наведе француската министерка за туризам Натали Делатр да изјави дека една од целите на францускиот туризам е да ги охрабри посетителите да трошат повеќе и да останат подолго.
Франција има поразновидна туристичка понуда
Во 2024 година француските туристи потрошија околу 74 милијарди долари (71 милијарда евра), додека туристите во Шпанија потрошија дури 148 милијарди долари (126 милијарди евра).
Можеби подолгите престои и поголемата потрошувачка придонесуваат за поголемо непријателство од страна на локалното население?
И Франција и Шпанија воведоа строги ограничувања за „Ербиенби“ и други краткорочни изнајмувања, но географијата исто така игра улога.
Земјите се слични по големина - Франција е само 9 проценти поголема од Шпанија. Сепак, во однос на населението, Франција имала околу 69 милиони луѓе во 2021 година, додека Шпанија имала нешто над 46 милиони. Големи делови од Шпанија се ретко населени или целосно ненаселени бидејќи се природно неповолни за живот, што врши огромен притисок врз градовите и крајбрежјето, каде што туристите се најконцентрирани.
Во Франција, иако повеќето луѓе живеат во регионот Ил-д-Франс (Париз и околината), земјата има и неколку градови распослани низ внатрешноста, како што се Лион, Тулуз и Стразбур. Благодарение на географијата и историјата, туристите во Франција одат не само во Париз, туку и во други региони.
Значи, иако повеќето туристи се собираат на добро познати локации како Париз, туристичките текови сепак се порамномерно распределени. Така, туризмот не оптоварува одредени области во иста мера како во Шпанија.
Извор: forbes.n1info.rs
Фото: Freepik