Милијардерот и основач на „Мајкрософт“, Бил Гејтс, сведочеше пред американскиот конгресен комитет дека осудениот сексуален престапник Џефри Епстин се обидел да го уценува користејќи ги неговите вонбрачни афери против него.

Сведочејќи зад затворени врати, Гејтс рече дека Епстин ги користел информациите за неговите афери надвор од бракот со тогашната сопруга Мелинда Гејтс за да го присили повторно да воспостави контакт со него, откако Гејтс рекол дека почнал да ги прекинува врските со Епстин.

Претставник на Гејтс објави копија од неговото подготвено сведочење за комитетот, во кое ги повторува претходните изјави дека жали што воопшто имал каква било врска со Епстин, но дека не учествувал во никакво криминално однесување и дека никогаш никого не виктимизирал.

Контактите на Гејтс со Епстин станаа познати откако Епстин беше уапсен во 2019 година од страна на федералните власти под обвинение за трговија со луѓе за сексуална експлоатација. Тоа му го наруши јавниот углед на Гејтс, придонесе за влошување на неговиот брак и оваа година ја поттикна неговата хуманитарна фондација да одобри нова надворешна ревизија на врските на Гејтс со осудениот престапник, кој почина додека чекаше судење.

- Во работата со која се занимавам репутацијата е основа за развивање партнерства што спасуваат животи. Средбата со Епстин беше сериозна грешка во процената и ја доведе оваа работа во ризик. Неговото однесување беше спротивно на сите мои напори да придонесам за свет во кој секој има шанса да живее здрав и продуктивен живот - рече Гејтс во својата изјава.

Гејтс призна дека требало подобро да го провери Епстин пред да се сретне со него во 2011 година.

- Се сеќавам дека бев свесен дека Епстин имал претходни правни проблеми, но не ги разбрав целосно размерите на злосторствата што ги направил. Го прифатив запознавањето без потребната проверка што требаше да ја направам - рече Гејтс.

Гејтс имал неколку средби со Епстин до декември 2014 година, наведувајќи дека тие главно биле поврзани со можноста за основање добротворен фонд, што никогаш не се остварило. Гејтс рече дека Епстин потоа се обидел да ги искористи неговите вонбрачни афери за да го уцени да ги продолжат нивните разговори.

-Како што јавноста сега може да види врз основа на објавените документи, Епстин се обидувал да ги искористи информациите за моите неверства за да ме присили повторно да стапам во контакт со него - продолжи Гејтс.

Гејтс му кажа на Конгресот дека длабоко жали што на кој било начин имал контакт со Епстин.