Многу возачи веруваат дека новиот автомобил е секогаш и најдобриот избор, но искусниот механичар Хуан Хозе Ебенезер смета дека годината на производство сама по себе не говори речиси ништо за квалитетот на едно возило. Според неговите зборови, многу поважни се начинот на кој е конструиран автомобилот, квалитетот на изработката и доверливоста на моторот.

На едно од своите тик-ток-видеа тој го издвојува „Мерцедес-Бенц С500“ од 2005 година, модел за кој вели дека е еден од најдобрите автомобили што германскиот производител некогаш ги направил.

- Зошто сите мислат дека добриот автомобил мора да биде нов? Ова е „Мерцедес-Бенц С500“, врвот на понудата од времето кога „Мерцедес“ правеше автомобили без компромиси - вели Ебенезер.

Како што истакнува тој, овој модел ниту повеќе од две децении по претставувањето не го изгубил квалитетот. Посебно го пофали неговиот бензински В8 мотор, кој го смета за исклучително доверлив и моќен.

- Тоа е мотор кој се покажа како исклучително доверлив. Секако, ниту еден автомобил не е совршен, па ни овој. На пример, управувачката единица сместена во горниот дел од возилото знае да се загрее и повремено да прави проблеми - објаснува тој.

Додава дека електрониката кај овој „Мерцедес“ е посложена отколку кај постарите модели, но смета дека тоа ни најмалку не го намалува неговиот вкупен квалитет.

Рeшенија кои и денес се пред своето време

Според неговите зборови, овој автомобил поседува низа функции кои ни денес не се вообичаени кај многу луксузни модели.

Како пример ги наведува вратите што автоматски се затвораат, како и седиштата што се прилагодуваат на положбата на возачот при минување низ кривини со цел возењето да биде поудобно.

- Управувачките детали покажуваат колку внимание е посветено на развојот на овој автомобил. Многу денешни модели од повисока класа немаат ништо значително подобро - смета Ебенезер.

Механичарот вели дека често наидува на сопственици кои сметаат дека возилото автоматски губи вредност и квалитет штом ќе наполни 15 или 20 години, што, според негово мислење, е потполно погрешен начин на размислување.

- Постојано слушам како луѓето велат дека нивниот автомобил е стар 15 или 20 години, како тоа само по себе да е маана. Тоа не е точно. Сè зависи од тоа каков автомобил сте купиле, каква механика има и колку квалитетно е направен - вели тој и додава дека фактот што некое возило е ново не значи автоматски дека е и подобро.

- Квалитетот зависи од многу повеќе работи отколку од годината на производство. Марката, моторот, начинот на конструкција и вкупниот квалитет на изработка се многу поважни од самиот датум на производство - истакнува тој.

Совет за купувачите: Прашајте механичар, а не интернетот

На крајот советува при купување половен или нов автомобил да не се донесуваат одлуки исклучиво врз основа на коментарите од интернет.

- Најпрво размислете што навистина треба да ви овозможи автомобилот, а потоа разговарајте со механичар на кого му верувате. Тој најдобро знае кои модели често ги поправа, а кои ретко се расипуваат - вели тој.

Кога станува збор за „Мерцедес“ од 2005 година, тој нема дилема.

- Тоа не е автомобил што луѓето го возат затоа што е евтин за одржување. Напротив, одржувањето може да биде скапо. Луѓето го купуваат затоа што станува збор за вистински автомобилски драгоцен камен. Да можам, и самиот би го купил - заклучува тој.

Извор: Nova.rs
Фото: Edmund