Снимка од војници на словенечката војска за време на обука стана вирален хит на „Тик-ток“. Видеото прикажува група војници кои маршираат во строј и изведуваат ритмичка песна. Еден војник го предводи пеењето, а остатокот од единицата гласно му возвраќа.
Во стиховите се споменуваат словенечките региони, со војнички хумор се опишува секојдневието во касарната, а на крајот се извикува: „За Словенија!“. Снимката предизвика бројни реакции.
Иако станува збор за вообичаена вежба која е дел од воената обука, видеото поттикна голем број хумористични коментари.
- Оваа војска може да војува само во Дизниленд - гласи еден од коментарите, додека друг корисник додал дека народот треба да ги брани војниците бидејќи се толку млади.
Дел од кампања за привлекување нови кандидати
Виралната снимка всушност е дел од новата кампања на словенечката војска под слоганот „Стани војник“. Целта на кампањата е да се поттикне интересот за воениот повик и да се привлечат нови кандидати. Во промотивното видео, Марја Павлин ги поканува заинтересираните да размислат за кариера во војската и објаснува како изгледаат пријавувањето, обуката и секојдневниот живот на еден војник.
Кампањата е насочена кон младите, но и кон сите полнолетни лица кои размислуваат за воена служба. Заинтересираните можат да се пријават преку официјалните конкурси, а пред да влезат во системот мора да ги исполнат пропишаните услови, да поминат лекарски преглед и постапка за селекција.
Важен дел од подготовката се воените кампови и обуките, на кои кандидатите минуваат низ физичка подготовка, учат за тимска работа и воена дисциплина и стекнуваат вештини потребни за воената служба.
Од словенечката војска порачуваат сите заинтересирани да ги следат официјалните конкурси и да ги проверат условите пред да се пријават.
Извор:
Index.hr
Фото: Screenshot/TikTok