Ако сакате да јадете повеќе овошје и зеленчук, а воедно да ја намалите изложеноста на пестициди, експертите велат дека треба да започнете со правење попаметни избори на храната. Нов извештај покажува кои 15 овошја и зеленчуци се меѓу најмалку контаминираните со пестициди.
„Енвајрментал воркинг груп“ го објави својот водич за 2026 година, кој е базиран на повеќе од 54.000 примероци тестирани од страна на Министерството за земјоделство на САД, а резултатите покажуваат дека речиси 60 проценти од примероците на листата „Клин фифтин“ не содржат никакви мерливи остатоци од пестициди. Истовремено, вкупно 264 остатоци од пестициди и нивните производи на разградување се пронајдени во тестираните примероци, дури и по плакнење под млаз вода.
Овошје и зеленчук со најмалку пестициди:
-ананас
-слатка пченка
-авокадо
-папаја
-кромид
-сладок грашок
-аспарагус
-зелка
-карфиол
-лубеница
-манго
-банани
-моркови
-печурки
-киви.
Важно е да се нагласи дека целта на ваквите листи не е да се обесхрабри консумирањето овошје и зеленчук. Како што наведуваат авторите на извештајот, поентата е да им се помогне на потрошувачите да донесуваат поинформирани одлуки, а не да се елиминира храната што е важна за здравјето.
Која храна е на листата со најмалку пестициди?
На врвот на листата за 2026 година се ананасот, слатката пченка и авокадото, а меѓу 15. видови храна со најмалку остатоци од пестициди се папаја, кромид, сладок грашок, аспарагус, зелка, карфиол, лубеница, манго, банани, моркови, печурки и киви.
Најзагрижувачкото нешто во извештајот
Еден од највпечатливите наоди се однесува на присуството на ПФАС пестициди, таканаречените „вечни хемикалии“. Според извештајот, пестицидот флудиоксонил е пронајден во 14 проценти од сите примероци, а речиси 90 проценти од праските и сливите содржеле траги од него. Во извештајот се споменуваат и флуопирамот и бифентринот како едни од најчесто откриените хемикалии.
Авторите, исто така, предупредуваат дека пестицидите не се појавуваат еден по еден, туку потрошувачите често се изложени на комбинации од неколку хемикалии одеднаш, што дополнително ја комплицира процената на вистинскиот ризик.
Овошје и зеленчук со најмногу пестициди:
-спанаќ
-кељ
-јагоди
-грозје
-нектарини
-праски
-цреши
-јаболка
-капини
-круши
-компири
-боровинки.
Како да ја намалите изложеноста без да се откажете од овошјето и зеленчукот?
Советот од експертите останува јасен: треба да продолжите да јадете овошје и зеленчук, без разлика дали избирате органски или конвенционално одгледувани. За оние што сакаат да ја намалат изложеноста на пестициди, еден од наједноставните чекори е почесто да избираат храна од листата „Клин фифтин“, а за производи со поголемо количество пестициди, да се одлучат за органски верзии кога е можно.
Покрај тоа, се препорачува темелно да се мијат овошјето и зеленчукот под млаз вода најмалку 20 секунди. Иако миењето не ги отстранува сите остатоци од пестициди, може да помогне во намалувањето на нивната количина.
Извор: tportal.hr
Фото: Freepik