Истражување на Универзитетот во Виена донесе први докази дека кучињата можат да разликуваат различни емоции на човечкото лице, вклучително и страв, лутина и тага.

Кучињата одамна важат за животни кои исклучително добро ги „читаат“ луѓето. Тие препознаваат кога сопственикот им се обраќа со весел глас, кога некој е лут, но и кога човекот е тажен. Сега научниците, со помош на снимање на мозочната активност, покажаа што всушност се случува во мозокот на кучето кога гледа човечко лице.

Истражувањето на научниците од Универзитетот во Виена е објавено во списанието „Ајсајнс“ и покажало дека кучињата не ги разликуваат изразите на човечкото лице само според поделбата на „позитивни“ и „негативни“ емоции. Нивниот мозок различно реагира и на страв, лутина и тага.

Во првиот дел од истражувањето, научниците со помош на магнетна резонанца ја следеле мозочната активност на осум кучиња додека им покажувале фотографии од непознати луѓе со неутрален или среќен израз на лицето. Среќните лица го активирале темпоралниот кортекс, дел од мозокот поврзан со повисоките когнитивни функции, а активноста се ширела и кон делот од мозокот кој има важна улога во системот за наградување. Токму оваа активност била особено интересна за истражувачите.

- Активноста во овој дел од мозокот сугерира дека среќните човечки лица може да имаат емоционално значење за кучињата - објаснува Лаура Куаја од Универзитетот во Виена, водечки автор на истражувањето.

Потоа научниците го прошириле истражувањето. 12 кучиња гледале фотографии од луѓе кои покажуваат среќа, лутина, страв и тага, додека истражувачите ја следеле нивната мозочна активност.

Со помош на методи на машинско учење, тие ги анализирале обрасците на активност во мозокот на кучињата. Резултатите покажале дека одредени мозочни региони особено реагирале на среќни лица, додека анализата на активноста во целиот мозок открила различни обрасци за одделни негативни емоции.

Со други зборови, мозокот на кучињата не правел само разлика меѓу „добро“ и „лошо“. Тој покажал обрасци што овозможуваат да се разликуваат стравот, лутината и тагата.

Според истражувачите, ова е првиот доказ од ваков вид дека кучињата можат да разликуваат различни негативни емоции на човечкото лице.

- Луѓето се многу добри во забележувањето на ситните детали на лицето, а и кучињата се многу добри во тоа - вели Раул Ернандез-Перез, првиот автор на истражувањето.

За научниците ова е особено интересно бидејќи луѓето и кучињата поминале низ целосно различни еволутивни патишта. Сепак, во текот на илјадници години припитомување, кучињата развиле извонредни социјални способности кои им овозможуваат да ги разбираат луѓето и да соработуваат со нив.

Истражувањето сепак не значи дека кучињата ги доживуваат емоциите на ист начин како луѓето.

Покрај тоа, во експериментот учествувале домашни кучиња од семејна средина, па резултатите не можат автоматски да се применат на кучиња кои живеат на улица или во поинакви социјални услови. А во реалниот живот кучето не го набљудува само човечкото лице.

Кога проценува што чувствува човекот, истовремено го следи говорот на телото, тонот на гласот и другите звуци, а го користи и сетилото за мирис. Токму затоа научниците сега сакаат да истражат како мозокот на кучињата ги комбинира сите овие информации.

Тимот од Универзитетот во Виена во следните истражувања сака подетално да испита како кучињата комбинираат различни емоционални сигнали за да ги разберат луѓето од својата околина.

Извор: 6yka.com
Фото: Magnific